شەت ەلدەردەگى 2 ميلليارد 904 ميلليون تەڭگەنىڭ باعالى قاعازدارى جاريا ەتىلدى - قارجى مينيسترلىگى
بۇل تۋرالى ق ر قارجى مينيسترلىگىنىڭ باسپا ءسوز قىزمەتىنەن حابارلاندى.
مينيسترلىك مالىمەتىنە قاراعاندا، جاريا ەتۋ ناۋقانى بويىنشا بۇگىنگى كۇنى جالپى 2 تريلليون 657,5 ميلليارد تەڭگە سوماسىن قۇرايتىن 107997 ءوتىنىش (دەكلاراتسيالار) تۇسكەن، ونىڭ ىشىندە جاريا ەتىلگەنى 2 تريلليون 337,3 ميلليارد تەڭگەنى قۇراپ وتىر.
«اتاپ ايتقاندا، مۇلىكتەردى جاريا ەتۋ جونىندەگى جەرگىلىكتى اتقارۋشى ورگاندار جانىنداعى كوميسسياعا جالپى سوماسى 1 تريلليون 74,5 ميلليارد تەڭگەنى قۇرايتىن جىلجىمايتىن مۇلىكتى جاريا ەتۋى ءۇشىن 104335 ءوتىنىش تۇسكەن. سونىڭ ىشىندە 100313 نىسان، باعالى قاعازدار جانە اقشا سوماسى 805.6 ميلليارد تەڭگەگە جاريا ەتىلدى. ال سالىق ورگاندارىنا قازاقستان اۋماعىنان تىسقارى جەرلەردەن 5,5 ميلليارد تەڭگە قۇرايتىن 136 تۇرعىن ءۇي وبەكتىسىن جاريا ەتۋ بويىنشا وتىنىشتەر كەلىپ ءتۇستى. سونىڭ ىشىندە 5,4 ميلليارد تەڭگەگە 127 وبەكت جانە 2904,2 ميلليون تەڭگە سوماسىندا باعالى قاعازدار جاريا ەتىلدى»، - دەلىنگەن باسپا ءسوز بايانىندا.
ق ر ۇلتتىق بانكىنىڭ دەرەگى بويىنشا ەكىنشى دەڭگەيلى بانكتەرگە 1 تريلليون 616,9 ميلليارد تەڭگە اقشانى جاريا ەتۋگە 3281 جيناق شوت اشىلدى. مۇلىكتى جاريا ەتۋ ءۇشىن الىم رەتىندە بيۋدجەتكە ءىس جۇزىندە 4,3 ميلليارد تەڭگە تۇسسە، سونىڭ 3 ميلليارد تەڭگەسى قايتارىلعان.
اۆتور: قانات مامەتقازى ۇلى
