قاڭتار وقيعالارىندا وق تيگەن 2 بالا كوز جۇمدى، 7-ەۋى جاراقات الدى
بۇل تۋرالى ق ر د س م مەديتسينالىق جانە فارماتسيەۆتيكالىق باقىلاۋ كوميتەتىنىڭ ءتوراعاسى باۋىرجان بايسەركين ايتتى، دەپ حابارلايدى قازاقپارات ءتىلشىسى.
«توتەنشە جاعداي كەزەڭىندە مەديتسينالىق ۇيىمدارعا 2740 زارداپ شەككەن ادام كومەك الۋعا جۇگىندى. ولاردىڭ ىشىندە 1843 ادام امبۋلاتورلىق كومەك الىپ، 897 ادام اۋرۋحاناعا جاتقىزىلدى. ونىڭ ىشىندە 188 ادام رەانيماتسيالىق بولىمشەدە بولدى. بۇگىندە 891 پاتسيەنت جازىلىپ شىقتى»، - دەدى باۋىرجان بايسەركين ورتالىق كوممۋنيكاتسيالار قىزمەتىندەگى باسپا ءسوز ءماسليحاتى بارىسىندا.
ونىڭ اتاپ وتۋىنشە، 177 ادام مەديتسينالىق ۇيىمداردا ومىردەن وزدى.
«قازىرگى ۋاقىتتا 6 ادام، الماتى مەن قىزىلوردادا 3 ادامنان ستاتسيونارلاردا ەم الىپ جاتىر. ولاردىڭ ءبىرىنىڭ جاعدايى اۋىر، وق تيگەن. ەم الۋدا. ەلىمىزدىڭ ءۇش وڭىرىندە كامەلەتكە تولماعان بالالار زارداپ شەكتى. الماتىدا 2 بالا وق ءتيىپ قازا تاپتى. 7 بالا ءتۇرلى وق جاراقاتىمەن اۋرۋحانا ءتۇستى. ولاردىڭ 4-ەۋى - الماتىدا، ەكەۋى - الماتى وبلىسىندا جانە بىرەۋى - جامبىل وبلىسىندا. سونىمەن قاتار الماتى وبلىسىندا ءبىر جۇكتى ايەل شاشىلعان گازدان زارداپ شەكتى»، - دەدى باۋىرجان بايسەركين.
اۆتور: مارلان جيەمباي
