فۋتبولدان ءا چ: ماسكەۋگە 2,7 ميلليون تۋريست كەلدى
بۇل تۋرالى رەسەي فەدەراتسياسىنىڭ تۋريزم جونىندەگى فەدەرالدىق اگەنتتىگىنە سىلتەمە جاساپ «حابار 24» ارناسى حابارلاۋدا.
اتاپ وتىلگەندەي، ماسكەۋگە كەلگەن تۋريستەر سانى 19 پايىزعا، سارانسكىدە 1678 پايىزعا ۇلعايعان. 300 مىڭ عانا تۇرعىنى بار سارانسك ءۇشىن بۇل تاريحي جاعداي بولدى. ال موردوۆيا استاناسىنا ون مىڭعا جۋىق پەرۋلىك كەلىپ- كەتكەن سوڭ شاھار پەرۋانسك دەپ اتالاتىن جاڭا بەيرەسمي اتاۋعا يە بولدى. شەتەلدىكتەردى رەسەيلىك قالانىڭ اتاۋلارى ابدەن ابىگەرگە سالدى. ءبىرى روستوۆتاعى دوندى ۇلى روستوۆپەن شاتاستىرسا، ءبىرى تومەنگى نوۆگوردقا جول ءجۇرىپ، ۇلى نوۆگوردتان ءبىر- اق شىققان. ال قىتايلىق تۋريستەر ماسكەۋ ۋنيۆەرسيتەتىن تاماشالاۋدىڭ ورنىنا موردوۆيالىق جوعارى وقۋ ورنىنا بارىپ قايتقان.
«ءتۇرلى قىزىقتى جاعدايلار بولدى. جانكۇيەرلەر تومەنگى نوۆگوردتى ۇلى نوۆگورودپەن شاتاستىرىپ العان. ءبىراق جەرگىلىكتى تۇرعىن شەتەلدىكتەردى جاقسى قارسى العان. تۋريستەر دە فۋتبولدى كورە الدى. تەك ستاديوننان ەمەس، ۇلكەن پلازمالىق تەلەديداردان. ءبىزدىڭ ادامدار اقپەيىل عوي. ەشكىمدى قيىندىقتا قالدىرمايدى»، - دەيدى ر ف تۋريزم جونىندەگى فەدەرالدىق اگەنتتىگىنىڭ باسشىسى ولەگ سافونوۆ.
مۋنديال وتكەن قالالاردا تۋريستەر اعىنى ورتا ەسەپپەن ون ەسەگە وسكەن. ۇيىمداستىرۋشىلار جانكۇيەرلەردىڭ جاعدايىن جاساۋ ءۇشىن ءتۇرلى شارالارعا بارعان. مىسالى، ماسكەۋدەگى ويىننىڭ كەستەسى جول كەپتەلىسىن ەسكەرىپ جاسالىنعان.
«ماسكەۋدە جۇما كۇندەرى ويىن وتكەن جوق. سەبەبى جاز ۋاقىتىندا تۇرعىندار قالا سىرتىنا كەتەدى. سوندىقتان جۇمادا مۇلدەم ويىن بولمادى. ۇزىن سونار جول كەپتەلىسىنىڭ دە الدىن الدىق»، - موسترانسپروەكت ديرەكتورى الەكساندر پولياكوۆ.
2018 -جىلعى الەم چەمپيوناتىنىڭ تاعى ءبىر ەرەكشەلىگى، جانكۇيەرلەر جەر استىندا دا ويىندى تىكەلەي ەفيردەن تاماشالاۋ مۇمكىندىگىنە يە بولدى.
«18,5 ميلليوننان اسا جولاۋشى مەترودا وتىرىپ- اق 50-گە جۋىق تىكەلەي ەفيردى تاماشالاپ ۇلگەردى. مۇنداي جاڭاشىلدىق الەم بويىنشا ءبىزدىڭ ەلدە العاش رەت بولىپ تۇر»، - دەيدى ماسكەۋلىك مەتروپوليتەننىڭ وكىلى يۋليا تەمنيكوۆا.
ماسكەۋ بيلىگى جانكۇيەرلەر ءۇشىن سىيىمدىلىعى 25 مىڭ ادامدى قۇرايتىن فانزونانى ۇسىندى. دەسە دە فۋتبولسۇيەر قاۋىم ەڭ كوپ جينالعان ايماق نيكولسكي كوشەسى بولدى. قىزىل الاڭنان باستاپ لۋبيانكاعا دەيىنگى اۋماقتا كۇندىز- ءتۇنى مەرەكە. ال تورتتىك فينالعا ماسكەۋ «سپارتاك» ستاديونىنىڭ جانىنان تاعى ءبىر جانكۇيەرلەر الاڭىن سىيعا تارتۋدى ءجون ساناعان. سوچيدە وتەتىن رەسەي- حورۆاتيا ويىنىنان باستاپ بۇل الاڭ ەسىگىن كەلۋشىلەرگە ايقارا اشادى.
ەسكە سالايىق، رەسەيدە فۋتبولدان 2018 -جىلعى الەم چەمپيوناتى 14 - ماۋسىم- 15 - شىلدە ارالىعىندا وتۋدە.
