بەنزين تاسىمالداۋشى كولىك جارىلىسى: 2 ادام قازا تاۋىپ، 70 ادام جارالاندى

ريم. قازاقپارات - يتاليادا بولونيا قالاسىنىڭ شەت جاعىنداعى جولدا بولعان بەنزين تاسىمالداۋشى كولىكتىڭ جارىلىسى سالدارىنان كەم دەگەندە ەكى ادام قازا تاۋىپ، 70 ءى جاراقاتتاندى، دەپ حابارلايدى BBC.

RaiNews24 تەلەارناسىنىڭ دەرەكتەرىنە قاراعاندا، 14 ادامنىڭ جاعدايى تىم اۋىر. ال جۇك كولىگى جانىپ كەتكەن.

لاپىلداعان وت سول ماڭعا جاقىن جەردەگى اۆتوسالوندى شارپىعان. سالدارىنان 10 ماشينا ورتەنىپ، جارىلعان.

توتەنشە جاعداي بولعان جەرگە ءورت ءسوندىرۋ جانە جەدەل جاردەم كولىگى باردى، جول ۋاقىتشا جابىق.

ايتا كەتەر جايت، جارىلىس قالالىق اۋەجاي ماڭىندا بولعان. تۆيتتەردە حابارلانعانداي، بولونيا اۋەجايى ورتتەن زارداپ شەكپەگەن جانە شتاتتىق رەجىمدە جۇمىس ىستەپ جاتىر.