ازاماتتارعا الەۋمەتتىك كومەك 2,5 ەسەگە ارتادى - «امانات» پارتياسى
بۇل تۋرالى «Qazaqstan» ۇلتتىق ارناسىنىڭ تىكەلەي ەفيرىندە ءوتىپ جاتقان پىكىرسايىستا «Amanat» پارتياسىنىڭ حاتشىسى ەلنۇر بەيسەنبايەۆ ايتتى، دەپ حابارلايدى قازاقپارات ءتىلشىسى.
«Amanat» پارتياسىنىڭ سايلاۋالدى باعدارلاماسى شىنايى تۇردە حالىقپەن بىرگە جازىلدى. ءبىز وسى كۇنگە دەيىن ەل- ەلدى ارالاپ، 1 ميلليونعا جۋىق ازاماتپەن تىكەلەي كەزدەستىك. كەزدەسۋ بارىسىندا ەلدىڭ ىشىندەگى قىمباتشىلىق، جۇمىسسىزدىق جانە ءبىر ازاماتتىڭ 1 وتباسىن كۇندەلىكتى تابىسىمەن اسىراپ وتىرعانىن كوردىك. ارينە، مۇنداي ماسەلە ەلىمىزدە بار. ءبىراق، وسى ماسەلەلەردى شەشۋدى تەك قانا «Amanat» پارتياسى ىسكە اسىرا الادى دەگەن ويدامىن. وسى كۇنگە دەيىنگى بارلىق ماسەلەنى ءبىز پوپۋليستىك ۇراندارمەن ەمەس، كەرىسىنشە الەۋمەتتىك- ەكونوميكالىق تۇرعىدان قاراستىرىپ وتىرمىز.
ەڭ بىرىنشىدەن، «Amanat» پارتياسى رەتىندە ادىلەتسىزدىكتى جويۋىمىز قاجەت. وليگوپولياعا جول بەرمەي، ونداعى بارلىق ماسەلەنى بىرگە تالقىلاۋىمىز كەرەك دەپ ەسەپتەيمىن. جەمقورلىق تۇبىمەن جويىلۋى ءتيىس. سونىمەن قاتار ءار وتباسىنىڭ، ءار ازاماتتىڭ تابىسىن ارتتىرۋعا اتسالىسۋمىز قاجەت. ءار وتباسىنىڭ تابىسىن ارتتىرۋ ءۇشىن ءبىز لايىقتى جالاقىنى ىلگەرىلەتەمىز. سونىمەن قاتار 100-دەگەن كاسىپورىن اشامىز»، - دەدى پارتيا حاتشىسى.
ونىڭ اتاپ وتۋىنشە، ءار ادام مەملەكەتتىڭ قامقورلىعىندا بولۋى كەرەك.
«ازاماتتارعا الەۋمەتتىك كومەك 2,5 ەسەگە ارتاتىن بولادى. ءاربىر ازاماتتىڭ، ونىڭ ىشىندە اۋىر ونەركاسىپتە جۇرگەن ازاماتتاردىڭ زەينەت جاسىن تومەندەتۋگە اتسالىسامىز. قازاقستاندا ءاربىر بالا باقىتتى بولۋى ءتيىس. سابيلەرىمىز 100 پايىز بالاباقشامەن قامتاماسىز ەتىلۋى قاجەت. اپاتتى جاعدايداعى، ءۇش اۋىسىمدى مەكتەپتەردى تۇبەگەيلى جويۋىمىز كەرەك. مۇنان بولەك، جاستارعا جاڭا مۇمكىندىكتەر بەرەمىز. بىرىنشىدەن، 1,5 ميلليون جاستى جۇمىسپەن قامتيمىز. ەكىنشىدەن، ستۋدەنتتىك شاكىرتاقىنى 2 ەسەگە ارتتىرامىز. جاستاردىڭ جاتاقحانا ماسەلەسىن تۇبەگەيلى شەشەمىز. جاستارعا مۇمكىندىگىنشە كومەك كورسەتەمىز»، - دەدى ەلنۇر بەيسەنبايەۆ پىكىرسايىس بارىسىندا.
ەسكە سالا كەتەيىك، «Qazaqstan» ۇلتتىق ارناسىنىڭ تىكەلەي ەفيرىندە ءماجىلىس سايلاۋىنا قاتىساتىن 7 ساياسي پارتيا وكىلدەرىنىڭ اراسىندا وتكەن پىكىرسايىس بىرەر ساعات بۇرىن اياقتالدى. وعان «Amanat» پارتياسىنان ەلنۇر بەيسەنبايەۆ، «اۋىل» حالىقتىق دەموكراتيالىق پارتياسىنان جيگۋلي دايرابايەۆ، Respublica پارتياسىنان سىرىمبەك تاۋ، قازاقستان حالىق پارتياسىنان اسحات اسىلبەكوۆ، «بايتاق» جاسىلدار پارتياسىنان ازاماتحان امىرتايەۆ، «اق جول» دەموكراتيالىق پارتياسىنان بەرىك دۇيسەمبينوۆ، ال جالپىۇلتتىق سوتسيال-دەموكراتيالىق پارتياسىنان نۇرلان اۋەسبايەۆ قاتىستى.
