جاستارعا ارنالعان 2,5 پايىزدىق نەسيەنى الۋ ءۇشىن كەپىلگە نە قويۋ كەرەك
بۇل جايىندا ورتالىق كوممۋنيكاتسيالار قىزمەتىندە وتكەن بريفينگىدە ايتىلدى.
ب ا ق وكىلدەرىنىڭ ساۋالىنا جاۋاپ بەرگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ ماماندارى اتالعان نەسيە الۋ ءۇشىن مىندەتتى تۇردە كەپىلگە مۇلىك قويۋ كەرەكتىگىن ءتۇسىندىردى.
ولاردىڭ ايتۋىنشا، كەپىلدىك رەتىندە جىلجىمايتىن مۇلىك پەن ارنايى تەحنيكا قويىلادى.
«جاستارعا ميكروكرەديت بەرۋ جاڭا قۇرال بولماق. كرەديتتەر 21 دەن 35 جاسقا دەيىنگى ارالىقتاعى جاستارعا بەرىلەدى. بۇل رەتتە پايىزدى مولشەرلەمە 2,5 پايىز بولادى. مەرزىمى - 5 جىلعا دەيىن. ال مال شارۋاشىلىعى باعىتىندا السا، 7 جىلعا دەيىن. سونىمەن قاتار نەگىزگى قارىز بەن سىياقىنى وتەۋ بويىنشا جەڭىلدىكتى كەزەڭ بەرىلەدى. ونىڭ ۇزاقتىعى ميكروكەديت مەرزىمىنىڭ ۇشتەن بىرىنەن اسپاۋى كەرەك. بۇل كرەديتتەردى «اگرارلىق كرەديتتىك كورپوراتسيا» ا ق بەرەدى»، - دەدى ۆيتسە-مينيستر ولجاس وردابايەۆ.
