قازاقستاندا اۋىلدا تۇراتىن 2,5 ميلليون تۇرعىن كەڭ جولاقتى ينتەرنەتكە قول جەتكىزەدى
«اۋىلدىق ەلدى مەكەندەرگە تالشىقتى-وپتيكالىق بايلانىس جەلىلەرىن (ا ە م ت و ب ج) تارتۋ جوباسى ءبىزدىڭ كومپانيا مەملەكەتتىك-جەكەشە ارىپتەستىك تەتىگى ارقىلى ىسكە اسىرىپ وتىرعان ەڭ اۋقىمدى ءارى العاشقى جوبا. 2020-جىلدىڭ سوڭىنا دەيىن ءوز قاراجاتىمىزعا تالشىقتى-وپتيكالىق جەلىلەردى تارتىپ، وعان مەملەكەتتىك مەكەمەلەردى، بيۋدجەت ۇيىمدارىن قوسۋدى جوسپارلاپ وتىرمىز. ستراتەگيالىق جوبانىڭ ەرەكشە ماڭىزى مىنادا، قۇرىلعان ينفراقۇرىلىمدى نارىقتىڭ باسقا قاتىسۋشىلارىنىڭ دا سەرۆيستەر ۇسىنۋىنا قولدانۋعا بولادى. سونىڭ ىشىندە ۇيالى بايلانىس كومپانيالارىنىڭ ىشكى جەلىلەردى تارتۋىنا، تولىق سپەكترلى تەلەكوممۋنيكاتسيا قىزمەتتەرىن كورسەتۋىنە مۇمكىندىك بەرەدى.
«قازاق تەلەكوم» مەملەكەتتىك- جەكەشە ارىپتەستىك اياسىندا «تالشىقتى-وپتيكالىق بايلانىس جەلىلەرى تەحنولوگياسى بويىنشا قازاقستان رەسپۋبليكاسىنىڭ اۋىلدىق ەلدى مەكەندەرىن كەڭ جولاقتى قولجەتىمدىلىكپەن قامتاماسىز ەتۋ» جوباسىن ىسكە اسىرىپ كەلەدى. كەلەر جىلدىڭ اياعىنا قاراي مەكتەپتەر، مەديتسينا مەكەمەلەرى، اكىمدىكتەر، ۇلتتىق قورعانىس نىساندارى، پوليتسيا، اپات قىزمەتتەرى سەكىلدى مەملەكەتتىك ۇيىمدار مەن بيۋدجەتتىك مەكەمەلەر جىلدام ينتەرنەتپەن قامتىلادى»، - دەلىنگەن حابارلامادا.
مەملەكەتتىك مەكەمەلەردەن بولەك، قاراپايىم اۋىل تۇرعىنىنىڭ دا جىلدام ينتەرنەتكە قولى جەتەدى. جوبا اياسىندا ەلىمىزدىڭ 828 اۋىلىنا جىلدام بايلانىس جەلىسى تارتىلادى. سول ارقىلى 2500 مەملەكەتتىك مەكەمە جانە 2,5 ميلليون ادام قامتىلادى.
ەسكە سالا كەتسەك، پارلامەنتتە سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ اۋىلدار مەن قالالارداعى ينتەرنەت تاريفىندە ايىرماشىلىق بولمايتىنى جونىندە ءمالىم ەتكەن.
