استانادا مىلقاۋ جىگىت قوقىستان تاۋىپ العان 2,5 ميلليون تەڭگەنىڭ اشەكەي بۇيىمىن قايتارىپ بەردى
بۇل تۋرالى ەلوردا ينفو تىلشىسىنە دۇكەن كۇزەتشىسى جاندوس ءامىرحانوۆ تەلەفون ارقىلى حابارلادى. «شىنىمدى ايتسام، بۇل وقيعانىڭ وسىلاي اياقتالعانىنا قۋانىشتىمىن. وقيعا بىلاي بولدى: ەكى كۇن بۇرىن ماعان ءبىر ەر ادام قوڭىراۋ شالىپ، وسى اۋماقتا (7 كونتينەنت) تۇرعان ادام تۋرالى حابارلادى. شامالاپ مەكەن-جايىن ايتتى. «ماسكەۋ» ءۇي كەشەنىنىڭ ماڭىندا ءوز ءۇيى بار دەدى. اۋىزشا سيپاتتاپ بەردى: ورتا بويلى، ساقالدى ەر ادام. بۇگىن جۇمىستا وتىرىپ جارتى ساعات بۇرىن دالاعا شىقتىم. قاراسام الگى سيپاتتاپ بەرگەن ادام كەلە جاتىر. ەكى كۇن بۇرىنعى قوڭىراۋ ەسىمە ءتۇستى. قاسىنا بارىپ سويلەستىم»، - دەيدى كۇزەتشى.
ونىڭ ايتۋىنشا، قۇنى 2,5 ميلليون تەڭگەنىڭ بۇيىمدارىن تاۋىپ العان ادام مىلقاۋ ەكەن. «زەرگەرلىك بۇيىمداردىڭ سوندا ەكەنىن ءتۇسىندىم. ول ەرتەڭ الىپ كەلەمىن دەدى. مەن بىردەن ۇيىنە بارۋدى ۇسىندىم. ءوزى مىلقاۋ، سويلەي المايدى. قاعازعا مەكەن-جايىن جازىپ بەردى. ءبىز ۇيىنە بارىپ، بۇيىمداردى الدىق. سىياقى رەتىندە 100 مىڭ تەڭگە بەردىك. بۇيىمنىڭ بارلىعى ورنىندا، بىرەۋىنە دە تيىسپەپتى»، - دەدى ءامىرحانوۆ.
بۇعان قوسا ول ەكى كۇن بۇرىن تەلەفون ارقىلى كۇمىس بۇيىمداردى تاۋىپ العان ازامات تۋرالى اقپارات بەرگەن ەر ازاماتقا سىيلىق جاساماق نيەتتە. «ەكى كۇن بۇرىن تەلەفون شالىپ اقپارات بەرگەن ازاماتتىڭ اتى - بەكزات. مەندە ونىڭ ءنومىرى ساقتاۋلى. اقشالاي سىيلىق جاساپ، العىسىمدى بىلدىرگىم كەلەدى»، - دەدى دۇكەن كۇزەتشىسى. سونداي-اق جىگىت ەندى قوقىس شىعارماس بۇرىن تەكسەرىپ وتىراتىنىن ايتتى. «قوقىس شىعارۋعا قورقاتىن بولدىم»، - دەدى ول ءسوز سوڭىندا.
