قازاقستاندا بۇيرەك اۋىستىرۋعا 2,5 مىڭعا جۋىق ادام مۇقتاج - فوتو
شاراعا دونور مەن رەسيپيەنت رەتىندە باۋىر اۋىستىرعان 80 گە جۋىق ادام قاتىستى. ولار «باۋىرىمدى باۋىرىما سىيلايمىن» مەدالىمەن ماراپاتتالدى.
ا. ن. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ ماماندارى ازىرلەگەن مەدالمەن ادام ءومىرىن ۇزارتۋعا ولشەۋسىز ۇلەس قوسقان جاندار ماراپاتتالدى. 
سىزعانوۆ اتىنداعى ۇلتتىق عىلىمي حيرۋرگيا ورتالىعى باسقارماسىنىڭ ءتوراعاسى، الماتىنىڭ باس ترانسپلانتولوگى بولاتبەك بايماحانوۆ قازىر قازاقستاندا 5 مىڭنان استام ناۋقاس دياليزدە ەكەنىن، ونىڭ 2,5 مىڭعا جۋىعى بۇيرەك اۋىستىرۋعا مۇقتاج ەكەنىن ايتتى.
تاعى 500 گە جۋىق ادام باۋىر اۋىستىرۋعا، 45-50 گە جۋىعى جۇرەك اۋىستىرۋعا مۇقتاج. سونداي-اق باۋىر اۋىستىرۋ - جۇرگىزىلىپ جاتقان وتالاردىڭ ىشىندەگى ەڭ كۇردەلىسى ەكەنىن ءتۇسىندىردى. «باۋىر - قان ءتۇزۋ ورگانى. وتا قان جوعالتپاي، اسقىندىرىپ الماي جاسالۋى قاجەت. كەيىننەن ونىڭ دەنساۋلىق جاعدايىنا كەرى اسەرى بولماۋى قاجەت. تەك 30 پايىز باۋىر رەتسپيەنتتە قالادى، ول دەنە كولەمىنە جەتكىلىكتى بولۋى ءتيىس. باۋىر جەتىمسىزدىگىمەن پروبلەمالار بولماۋ ءۇشىن ءار دونورعا 60-70-كە جۋىق زەرتتەۋ جۇرگىزىلەدى»، - دەدى مامان. 
«جاراقاتتان 30 مىڭعا جۋىق ادام قازا بولادى، ونىڭ 3 مىڭى باۋىر جاراقاتىنان. ادامدار، كوماندا جەتكىلىكتى جوعارى دەڭگەيدە وتا جاساۋعا ءازىر. مەملەكەت - ءدارى- دارمەكپەن قامتاماسىز ەتەدى. قوعام بۇنىڭ ماڭىزدى ەكەنىن ءتۇسىنۋى قاجەت»، - دەپ قوستى ول.
