استانادا «جاۋجۇرەك پولكى» مارشىنا قاتىسۋشىلار 2,5 شاقىرىم ءجۇرىپ وتەدى

استانا. قازاقپارات - 2017-جىلعى 9- مامىردا استانا قالاسىنىڭ ىشكى ساياسات باسقارماسىنىڭ قولداۋىمەن ەلوردامىزدا ايتۋلى شەرۋ - ەكىنشى دۇنيەجۇزىلىك سوعىس ارداگەرلەرى ۇرپاقتارىنىڭ قاتىسۋىمەن «جاۋجۇرەك پولكى استانا - الەمدىك مارش» اتتى شەرۋ وتەدى.

شارا حالىقارالىق جەڭىس كۇنىنە ارنايى ۇيىمداستىرىلادى، دەپ حابارلايدى قازاقپارات.

«جاۋجۇرەك پولكى» («بەسسمەرتنىي پولك») جالپى حالىقتىق ازاماتتىق باستاماسى 2012-جىلى پايدا بولدى. قوزعالىستىڭ نەگىزگى ماقساتى - ەكىنشى دۇنيەجۇزىلىك سوعىسقا قاتىسقان ارداگەرلەردىڭ ەرلىگىن ەستەن شىعارماۋ.

ال استانا قالاسىنداعى «جاۋجۇرەك پولكى» كەڭەسى 2014-جىلى قۇرىلدى، ونىڭ قۇرامى ەرىكتىلەردەن، ارداگەرلەرگە قۇرمەت كورسەتە بىلەتىن ەلىمىزدىڭ بەلسەندى ازاماتتارىنان تۇرادى. استانا قالاسىندا جەڭىستىڭ 70 جىلدىعىنا ارنالعان شەرۋگە 2015-جىلى 1500 ادام قاتىسقان بولاتىن، ولار ارداگەرلەردىڭ پورترەتتەرىن قولدارىنا ۇستاپ جەڭىس داڭعىلىمەن ءجۇرىپ وتسە، 2016-جىلى ەلورداداعى «جاۋجۇرەك پولكىنە» 7 مىڭنان استام ادام قاتىستى. قازىرگى ۋاقىتتا «جاۋجۇرەك پولكى» - بۇل الەمنىڭ 60 مەملەكەتىن بىرىكتىرەتىن حالىقارالىق شەرۋ. پولكتىڭ جۇمىسى جارعىمەن رەتتەلەدى.

جارعىدا ايتىلعانداي: «جاۋجۇرەك پولكى» - كوممەرتسيالىق ەمەس، ساياسي ەمەس، مەملەكەتتىك ەمەس ازاماتتىق باستاما. پولك قۇرامىنا دىنىنە، ۇلتىنا، ساياسي كوزقاراسىنا قاراماستان كەز كەلگەن ازامات كىرە الادى. «جاۋجۇرەك پولكى استانا - الەمدىك مارش» شەرۋىنە قاتىسۋشىلاردى جيناۋ 2017-جىلى 9- مامىر كۇنى ساعات 12.30 باستالادى. شەرۋ «قازاق ەلى» مونۋمەنتىنەن باستالىپ، «وتان قورعاۋشىلار» مەموريالىندا (تاۋەلسىزدىك داڭعىلىنىڭ بويىندا) اياقتالادى.

وسىلايشا، بيىل شەرۋ 2,5 شاقىرىمعا ۇزارتىلدى. ايتا كەتەيىك، «جاۋجۇرەك پولكى استانا» مارشىنا قاتىسۋ ءۇشىن الدىن-الا تىركەۋدەن ءوتۋدىڭ نە وعان بيلەتتەر ساتىپ الۋدىڭ قاجەتى جوق. مارش الاڭىن جارناما رەتىندە پايدالانۋعا جانە ترانسپارانتتاردا كەز كەلگەن ساياسي، كورپوراتيۆتىك نە باسقا دا سيمۆولداردى جاريالاۋعا تىيىم سالىنادى.