ەرتىس وزەنىندە 2,5 مىڭ كەمەگە ارنالعان ءجۇزۋ ماۋسىمى اشىلدى

پاۆلودار. قازاقپارات - پاۆلودار وبلىسىندا ەرتىس وزەنى ارقىلى كەمە ءجۇزۋ ماۋسىمى رەسمي تۇردە اشىلدى.  

پاۆلودار وبلىسى بويىنشا كولىكتىك باقىلاۋ ينسپەكتسياسىنىڭ باس مامانى نۇرلان ۆاليتوۆتىڭ ايتۋىنشا، قازىرگى تاڭدا ايماقتا ءىرىلى- ۇساقتى 2541 كەمە تىركەلگەن،

 دەپ حابارلايدى  pavlodarnews.kz.  

  بۇل - بىلتىرعى جىلعا قاراعاندا 129 بىرلىككە ارتىق كورسەتكىش.

- وتكەن دەمالىستا ماماندار كەمە جولدارىنىڭ قاۋىپسىزدىگىن قامتاماسىز ەتۋ ماقساتىندا وزەننىڭ تەرەڭدىگىن تەكسەرىپ، قالقىما بەلگىلەر ورناتتى. شىعىس قازاقستان، ومبى وبلىستارى اراسىنداعى كەمە سۋ جولدارى جىلداعىداي جانداندى. بۇگىنگى كۇنگە دەيىن ەرتىس ارقىلى جۇزەتىن كەمەلەردىڭ تەحنيكالىق جاعدايى ويداعىداي. بۇعان دەيىن ولاردىڭ بارلىعى تەكسەرۋدەن وتكەن. پاۆلودار ايماعىندا سۋ جولدارى جوعارى جانە تومەنگى ەرتىس دەگەن ەكى ۋچاسكەگە بولىنەدى. وبلىس پەن شىعىس قازاقستان ءوڭىرىن وزەن ارقىلى بايلانىستىراتىن العاشقى بولىگى 222 شاقىرىم بولسا، كورشىلەس ومبىمەن قاتىناستى نىعايتاتىن ەكىنشى ۋچاسكە 381 شاقىرىمعا سوزىلعان، - دەيدى ن. ۆاليتوۆ.   

 مامانداردىڭ سوزىنە قاراعاندا، وسى جىلى پاۆلوداردان ومبى وبلىسىنا قيىرشىق تاستىڭ 120 مىڭ تونناسى تاسىمالدانباق. اتالمىش قۇرىلىس ماتەريالىنان باسقا كورشى ەلگە قۇم مەن كومىر دە جەتكىزىلمەك. سونداي- اق، بيىل حانتى- مانسييسك وڭىرىنە شامامەن 1,5 توننا تەحنيكالىق تۇز جونەلتۋ جوسپاردا بار. ايتا كەتەرلىگى، قازىرگى تاڭدا  ەرتىستىڭ ماڭايىنداعى كاسىپورىندار مەن ينفراقۇرىلىمداردا 1000-نان استام ادام ەڭبەك ەتۋدە. ولاردىڭ قاتارى ءوز ءىسىنىڭ شەبەرى اتانۋدى ماقسات ەتكەن جاس ماماندارمەن تولىعا تۇسۋدە.