شامامەن 2,5 ميلليون جىل بۇرىن ءومىر سۇرگەن ادامنىڭ سۇيەگى تابىلدى
دەپ حابارلادى massaget.kz پورتالى 24kz تەلەارناسىنىڭ رەسمي سايتىنا سىلتەمە جاساي وتىرىپ.
وڭتۇستىك افريكاداعى يوحاننەسبۋرگ قالاسىنان 50 شاقىرىم جەردە ورنالاسقان مىنا اۋماق «ادامزاتتىڭ بەسىگى» دەپ اتالادى. بۇل جەردەن ادامنىڭ سۇيەگى وسىعان دەيىن دە تابىلعان. الايدا، بۇل جولعى ولجا بۇگىنگە دەيىنگى بىردە دە ءبىر تىرشىلىك يەسىنە ۇقسامايدى. ونى ۇڭگىردەن الىپ شىققان عالىمدار سۇيەك ەمەس، ات باسىنداي التىن تاپقاننان بەتەر قۋاندى.
انتروپولوگتار ادامنىڭ جاڭا تۇرىنە «حومو نالەدي»، اۋدارعاندا «جۇلدىز» دەگەن اتاۋ بەردى. ولار «دينالەدي» ۇڭگىرىنىڭ 12 مەترلىك تەرەڭىندە، جىرتقىشتار جەتپەيتىن جەردە جەرلەنگەن ەكەن. عالىمدار الىپ شىققان مىڭ جارىمعا تارتا سۇيەك شامامەن 8 بالا مەن 5 ەرەسەك ادامعا تيەسىلى. ۇلكەندەرىنىڭ سالماقتارى 45، بويلارى 1 مەتر 52 سانتيمەتر. ساۋساقتارى ءسال بۇگىلگەن، ال اياقتارى قيسىقتاۋ كەلگەن.
لي بەرگەر، انتروپولوگ:
- «حومو نالەدي» سىرتقى تۇرپاتى جاعىنان «حومو ساپيەنستەرگە» ۇقسايدى. ءبىراق مي ساۋىتى وتە كىشكەنتاي، اپەلسيننىڭ مولشەرىندەي عانا. ال جامباس سۇيەكتەرىنىڭ قۇرىلىسى ولاردى ادامداردان گورى اۆسترالوپيتەكتەرگە، ياعني پريماتتارعا جاقىنداستىرادى.
نەبارى 18 سانتيمەترلىك ساڭىلاۋدان ءوتىپ، مىڭ جارىم سۇيەكتى جيناپ سىرتقا الىپ شىعۋ، ولاردىڭ ءارقايسىسىن زەرتتەۋ قانشالىقتى قيىنعا سوققانىن بىزگە وسى ەكسپەديتسياعا قاتىسقان نازاربايەۆ ۋنيۆەرسيتەتىنىڭ قىزمەتكەرى، انتروپولوگ زاكاري كوفران ايتىپ بەردى.
زاكاري كوفران، نازاربايەۆ ۋنيۆەرسيتەتىنىڭ پروفەسسورى:
- افريكالىق زەرتتەۋشىلەر وسى ساياحاتقا قاتىسۋشىلاردى Facebook ارقىلى جيناعان. مەن ءوتىنىش بەرىپ، ءوتىپ كەتتىم. ءبىر ايعا سوزىلعان ساياحاتتان ەندى ورالعان بەتىم. الداعى ۋاقىتتا قازاقستاننىڭ جەرى مەن ەجەلگى تايپالار سۇيەگىن زەرتتەۋدى جوسپارلاپ وتىرمىن.
ءبىر قىزىعى، الەم جۇرتشىلىعىن ەلەڭ ەتكىزگەن بۇل جاڭالىقتى افريكالىق انتروپولوگتار 2013 -جىلى تاپقان. الايدا ونى تولىق زەرتتەپ، تەگى مەن جاسىن انىقتاعاننان كەيىن عانا جاريالاۋدى ءجون كورگەن.