قازاقستاننىڭ «ءۇشىنشى جاڭعىرۋى» جولداۋىنا ۇكىمەت 2,4 تريلليون تەڭگە بولەدى
بۇل تۋرالى ق ر ۇكىمەتى وتىرىسىندا 2017-2019 -جىلدارعا ارنالعان ناقتىلانعان رەسپۋبليكالىق بيۋدجەت جوباسىن تانىستىرا وتىرىپ، ق ر قارجى ءمينيسترى باقىت سۇلتانوۆ حابارلادى.
ونىڭ ايتۋىنشا، بيۋدجەتتىڭ شىعىس بولىگىن ناقتىلاۋدىڭ باسىم باعىتى مەملەكەت باسشىسىنىڭ جولداۋىن ىسكە اسىرۋ بولىپ تابىلادى. وسى ماقساتتارعا بيۋدجەتتە 2435 ميلليارد تەڭگە قاراستىرىلعان، دەپ حابارلايدى ق ر ۇكىمەتىنىڭ سايتى.
سونىمەن قاتار، جولداۋدى ىسكە اسىرۋ كەلەسى شارالار ارقىلى جۇزەگە اسىرىلاتىن بولادى: ەكونوميكانى جەدەلدەتىلگەن تەحنولوگيالىق جاڭعىرتۋ - 231 ميلليارد تەڭگە؛ بيزنەس ورتانى تۇبەگەيلى جاقسارتۋ جانە كەڭەيتۋ - 0,7 ميلليارد تەڭگە؛ ماكرو ەكونوميكالىق تۇراقتىلىق - 2093,1 ميلليارد تەڭگە؛ ادام كاپيتالىنىڭ ساپاسىن ارتتىرۋ - 86,2 ميلليارد تەڭگە؛ ينستيتۋتسيونالدىق تۇرلەندىرۋ، قاۋىپسىزدىك جانە سىبايلاس جەمقورلىقپەن كۇرەس - 23,9 ميلليارد تەڭگە.
