استانا اكىمدىگى ءاربىر قاڭعىباسقا كۇنىنە 2,3 مىڭ تەڭگە شىعىندايدى
بۇل تۋرالى «قازاقپارات» حالىقارالىق اقپارات اگەنتتىگىنىڭ رەسمي ساۋالىنا جاۋاپ بەرگەن جۇمىسپەن قامتۋ، ەڭبەك جانە الەۋمەتتىك قورعاۋ باسقارماسى باسشىسىنىڭ ورىنباسارى ساۋلە نۇرعوجينا ءمالىم ەتتى.
«2016 -جىلى بەلگىلى تۇراعى جوق ادامدار سانىن ازايتۋ ماقساتىندا 100 قىزمەت الۋشىعا جەكە باسىن كۋالاندىراتىن قۇجاتتارىن قالپىنا كەلتىرۋگە جاردەم كورسەتىلدى، ونىڭ ىشىندە 12 قىزمەت الۋشىعا 1974 -جىلعى ۇلگىدەگى پاسپورتتى ق ر ازاماتىنىڭ جەكە كۋالىگىنە اۋىستىرۋ جۇرگىزىلدى. ءتورت ادامعا جۇمىسقا ورنالاسۋعا جاردەم كورسەتىلدى. جەتى ادامعا مۇگەدەكتىك توپ راسىمدەلدى، 16 ادام «شاراپات» جانە «قامقور» الەۋمەتتىك قىزمەت كورسەتۋ ورتالىقتارىنا جولداندى»، - دەپ اتاپ ءوتتى ول.
سونداي-اق، ونىڭ سوزىنە قاراعاندا، 300 ادامعا ۇيگە ورالۋعا مۇمكىندىك جاسالدى. ولاردىڭ ىشىندە 56 كىسىگە بيلەت ساتىپ الىندى، جەكە جەتكىزۋشىلەرمەن كەلىسۋ ارقىلى 71 ادام ۇيلەرىنە جەتكىزىلگەن، 172 سى وتباسىلارىمەن قايتا قاۋىشتى. 2016 -جىلى العاشقى مەديتسينالىق كومەكتى 1397 ادام الدى.
بىلتىر الەۋمەتتىك بەيىمدەۋ ورتالىعىنا كەلگەن ادامدارمەن قوعامعا قايتا بەيىمدەۋ جونىندە 1366 كەلىسىم جاسالدى. قازىرگى ۋاقىتتا 1366 كەلىسىمنىڭ 788 ى ورىندالدى، 192 كەلىسىم 2017 -جىلى جۇزەگە اسادى دەپ كۇتىلۋدە.
