ۇلتتىق قوردان رەسپۋبليكالىق بيۋدجەتكە 2,2 تريلليون تەڭگە باعىتتالماق

«زاڭ جوباسى بيۋدجەت كودەكسىنىڭ جاڭا تالاپتارىن ەسكەرە وتىرىپ ازىرلەندى. ۇلتتىق قوردان بەرىلەتىن كەپىلدەندىرىلگەن ترانسفەرتتىڭ كولەمى جاڭا بيۋدجەتتىك قاعيداعا سايكەس مۇنايعا كەسىمدى باعانى ەسكەرە وتىرىپ ايقىندالدى جانە بولجام بويىنشا مۇناي سەكتورى ۇيىمدارىنان ۇلتتىق قورعا تۇسەتىن تىكەلەي سالىقتاردىڭ كولەمىنەن اسپايتىن بولادى. بۇل رەتتە، زاڭ جوباسىندا مۇنايدىڭ كەسىمدى باعاسى باررەللىنە 2023 -جىلى 48,9 ا ق ش دوللارى، 2024-2025 -جىلدارى 42,2 - 40,3 ا ق ش دوللارى دەڭگەيىندە بەلگىلەندى. وسىنى ەسكەرە وتىرىپ، رەسپۋبليكالىق بيۋدجەتكە كەپىلدەندىرىلگەن ترانسفەرتتىڭ مولشەرى 2023 -جىلى 2,2 تريلليون تەڭگە، ودان ءارى 2024 -جىلى 2 تريلليون تەڭگە جانە 2025 -جىلى 1,9 تريلليون تەڭگە كولەمىندە ايقىندالدى»، - دەدى ق ر ۇلتتىق ەكونوميكا ءمينيسترى الىبەك قۋانتىروۆ.

ونىڭ ايتۋىنشا، جوسپارلى كەزەڭدە ءتيىستى قاعيدالاردى قولدانۋ ۇلتتىق قوردىڭ ۆاليۋتالىق اكتيۆتەرىن 2023 -جىلى 66,7 ميلليارد ا ق ش دوللارىنا دەيىن قالپىنا كەلتىرۋگە، ودان ءارى 2024-2025 -جىلدارى 78,8 - 93,2 ميلليارد ا ق ش دوللارىنا دەيىن ارتتىرۋعا ىقپال ەتەدى.

«زاڭ جوباسىن ۋاقتىلى قابىلداۋ جوسپارلى كەزەڭدە رەسپۋبليكالىق بيۋدجەتتىڭ تەڭگەرىمدىلىگىن قامتاماسىز ەتۋگە جانە وسى رەتتە ۇلتتىق قوردىڭ تۇراقتاندىرۋ فۋنكتسياسىن ىسكە اسىرۋعا مۇمكىندىك بەرەدى»، - دەدى مينيستر.

اۆتور

رۋسلان عابباسوۆ