باتىس قازاقستاندا قۇنى 2,2 ميلليارد تەڭگە تۇراتىن تەرى وڭدەيتىن كاسىپورىن ىسكە قوسىلماق
وبلىس اكىمى التاي كولگىنوۆتىڭ سوزىنە قاراعاندا، زاۋىت جىلىنا 182 مىڭ دانا ءىرى قارا جانە 624 مىڭ دانا ۇساق مالدىڭ تەرىسىن وڭدەي الادى. بۇعان دەيىن وڭىردە مال تەرىسىن وڭدەۋ ءىسى قولعا الىنباعان بولاتىن.
ءوڭىر باسشىسىنىڭ ايتۋىنشا، وبلىستا اۋىل شارۋاشىلىعى سالاسىندا زاماناۋي تەحنولوگياعا نەگىزدەلگەن، الەمدىك تالاپتارعا ساي كەلەتىن وسىنداي قايتا وڭدەۋ كاسىپورىندارىن كوبەيتۋ كوزدەلۋدە. ايتالىق، وڭىرگە جىل سايىن 10 مىڭ توننا قۇس ەتى يمپورتتالادى. وسى ماسەلەنى شەشۋ باعىتىندا «جايىق قۇس» ج ش س قۇس فابريكاسىن سالىپ، الداعى جىلى پايدالانۋعا بەرمەكشى. سوندا وبلىس تۇرعىندارىنىڭ قۇس ەتىنە قاجەتتىلىگى وتەلەتىن بولادى. سونىمەن قاتار الەمگە ايگىلى فرانسيالىق «لاكتاليس» كومپانياسىنىڭ قۇرىلتايشىلىعىمەن جىلىنا 40 مىڭ توننا جوعارى ساپالى ءتۇرلى ءسۇت ونىمدەرىن شىعاراتىن زاۋىت سالۋ ويلاستىرىلۋدا. بۇل ءوندىرىس ورنىنىڭ قۇرىلىسى الداعى جىلى باستالىپ، 2018 - جىلى مارەگە جەتپەك.
جاڭگىر حان اتىنداعى باتىس قازاقستان اگرارلىق- تەحنيكالىق ۋنيۆەرسيتەت اۋماعىندا قۇنى 3,7 ميلليارد تەڭگەگە باعالانعان، تاۋارلى بەكىرە ەتى مەن قارا ۋىلدىرىق وندىرەتىن كەشەن جىل اياعىنا دەيىن ىسكە قوسىلماقشى.
«وبلىس تۇرعىندارىن وڭىردە وندىرىلگەن كوكونىس ونىمدەرىمەن قامتاماسىز ەتۋ ماقساتىندا قازىرگى زامانعى تالاپتارعا ساي كەلەتىن قويمالار سالۋ دا قاجەت. قازىرگى تاڭدا قويمالاردىڭ سىيىمدىلىعى 35 مىڭ توننا بولسا، سونى 60 مىڭ تونناعا جەتكىزۋ قاراستىرىلۋدا. وسىعان وراي ءىرى جىلىجاي كەشەندەرىن سالۋ قاجەتتىلىگى تۋىندايدى. مۇنىڭ ءبارى ەلباسىمىز بەرگەن تاپسىرمالارعا سايكەس اتقارىلۋدا»، - دەدى التاي كولگىنوۆ.
اۆتور: ەلجان ەرالى
