اپتاپ ىستىقتان يسپانيادا ءبىر ايدا 2,1 مىڭ ادام قايتىس بولدى

مادريد. قازاقپارات - كارلوس III دەنساۋلىق ينستيتۋتىنىڭ مالىمەتىنشە، يسپانيادا اۋا تەمپەراتۋراسىنىڭ شامادان تىس جوعارىلاۋىنان 2176 ادام كوز جۇمدى.

رەسمي مالىمەتكە سايكەس، 2015 -جىلدان بەرى بولعان ءولىم- ءجىتىمنىڭ ەڭ جوعارى كورسەتكىشى تىركەلىپ وتىر. قازاقپارات بۇل تۋرالى Euronews-كە سىلتەمە جاساپ حابارلايدى. يسپانيانىڭ وتباسىلىق جانە جالپى تاجىريبەلىك دارىگەرلەر قوعامىنىڭ وكىلى لورەنتسو ارمەنتەروس ادامداردىڭ دەنى جىلۋ سترەسىنەن قايتىس بولىپ جاتقانىن ايتادى.

«ءولىم-ءجىتىمنىڭ كوبىنە جىلۋ سترەسى سەبەپ بولعان. ول بىردەن بىرنەشە مۇشەگە كەرى اسەرىن تيگىزىپ، كوپتەگەن مۇشەلەر قىزمەتىنىڭ ىستەن شىعۋىنا جانە سونىڭ سالدارىنان ولىمگە اكەلۋى مۇمكىن»، - دەدى لورەنسو ارمەنتەروس.

11-17-شىلدە ارالىعىنداعى اپتادا يسپانيا جالپى ەۋروپادا ءولىم كورسەتكىشى ەڭ جوعارى ەل بولدى. زەرتتەۋشىلەر بۇعان سەبەپ رەتىندە اپتاپ ىستىق، كوروناۆيرۋس ىندەتىنىڭ سالدارى جانە مارقۇمداردىڭ ەگدە جاسىن اتايدى. قايتىس بولعانداردىڭ كوپشىلىگى - 85 جاستان اسقاندار. ەلدىڭ باسىم بولىگىندە اۋا رايىنا بايلانىستى ەسكەرتۋ جاريالاندى. يسپانيا بيىل ەكى رەت اپتاپ ىستىقتى باستان وتكەردى، ونداعى اۋا تەمپەراتۋرا بىرنەشە كۇن قاتارىنان سەلسي بويىنشا 40 گرادۋستان اسقان.

فوتو: ru.euronews.com