ەلىمىزدە سوڭعى 2 جىلدا گازەت-جۋرنالدارعا دەگەن قىزىعۋشىلىق 10پايىزعا تومەندەگەن

استانا. قازاقپارات - مۇنداي مالىمەتتى «قازپوشتا» مەكەمەسى كەلتىرىپ وتىر.

ولاردىڭ ايتۋىنشا، بۇل كۇنى كوپشىلىك عالامتورداعى اقپاراتقا جۇگىنەدى.

«گازەت -  حالىقتىڭ كوزى، قۇلاعى، ءھام ءتىلى»، - دەپ قازاقتىڭ اعارتۋشىسى احمەت بايتۇرسىنوۆ ايتقان ەدى. بۇرىن جۇرتشىلىق جاڭالىقتىڭ باستى جارشىسى بولعان گازەت ارقىلى شار تاراپتاعى مالىمەتتى بىلەتىن. بۇل كۇنى اقپارات الۋدىڭ الۋان ءتۇرلى ءتاسىلى بار.

ماسەلەن، ءبىر عانا ۇيالى تەلەفوننىڭ كومەگىمەن كوپشىلىك ۇيدەن شىقپاي، سوڭعى جاڭالىقتاردى بىلەدى. الەۋمەتتىك جەلى، اقپاراتتىق پورتالدار بۇگىندە گازەت بيزنەسىنىڭ باستى باسەكەلەستەرىنە اينالدى.

اسقاربەك قازانعاپ، @askarbek_ulytau:

- اكىمشىلىكتىڭ رۇقسات قاعازى، بولىنگەن جەر تەلىمى بولسا، قازاقستاندا قالاعان ادام گازەت ساتاتىن دۇڭگىرشەك اشا الادى. استانانىڭ سول جاعالاۋىندا ونداي دۇڭگىرشەكتەردى كوزىمىز شالمادى. وڭ جاعالاۋدا بارشىلىق، ءبىراق ءبىرسىپىراسى جابىق.

بۇگىندە كاسىپتەرى تۇرالاعاندىقتان، بۇل بيزنەس تابىس تابۋعا ءتيىمدى ەمەس. گازەت وقۋعا قۇلشىنعان جاستاردىڭ قاتارى سيرەگەنىنە ساۋالناما جۇرگىزۋ ارقىلى كوزىمىز جەتتى. قازىر الەۋمەتتىك جەلى باستى اقپارات كوزىنە اينالعانى انىق. اقپارات جانە كوممۋنيكاتسيالار مينيسترلىگىنىڭ مالىمەتىنشە، قازاقستاندا 2 مىڭنان استام گازەت پەن جۋرنال تىركەلگەن. سونىڭ ىشىندە «ۆرەميا» گازەتى ەڭ كوپ وقىلاتىن باسىلىمداردىڭ كوشىن باستاپ تۇر.

نارىقتا 1999 -جىلدان بەرى 130 مىڭنان استام تارالىممەن شىعىپ كەلەدى. وزگە وتاندىق گازەتتەر سەكىلدى ونىڭ دا سايتى بار. ويتكەنى، زامان كوشىنەن قالۋعا بولمايدى. باسىلىم باسشىسى ليەۆ تاراكوۆتىڭ ايتۋىنشا، ولار تۇبەگەيلى ينتەرنەت نۇسقاعا كوشپەيدى. ولاردىڭ كاسىبىنە تۇساۋ بولىپ تۇرعان وزگە دە جايتتار جەتەرلىك ەكەن.

لەۆ تاراكوۆ، «ۆرەميا» گازەتىنىڭ باس رەداكتورى:

- وبلىس ورتالىقتارىنداعى تۇرعىندارعا گازەتتەرىمىز قولجەتىمدى. ءبىراق شالعايداعى ادامدارعا كوبىنە جەتە بەرمەيدى. كۇن سايىن شىعاتىن گازەتتى اپتاسىنا ءبىر رەت قانا الۋى مۇمكىن. ءبىز شىعىندارىمىزدى نەگىزىنەن جارناما ەسەبىنەن عانا جاۋىپ وتىرمىز.

قازاقستاندا 200 گازەت جۋرنال جەكە دۇڭگىرشەكتەردە ساتىلادى. كوپشىلىك نەگىزىنەن شوۋ- بيزنەس، وي سەرگىتەتىن باسىلىمداردى وقيدى ەكەن.

امانگەلدى سادۋاقاسوۆ، «قازپوشتا» ا ق پوشتا بيزنەس دەپارتامەنتىنىڭ مەنەدجەرى: - قارجىلىق تۇرعىدان احۋالى جاقسى باسپا ونىمدەرى ەلەكتروندى فورماتقا وتۋدە. بۇل زاماننىڭ تالابى دەپ ويلايمىن.

قارجى قول بايلاۋ بولعاندىقتان، «نوماد پرەسس» سەكىلدى ءىرى دۇڭگىرشەكتەر جەلىسى ءبىرىنىڭ ارتىنان ءبىرى جابىلدى. سوندىقتان بۇل نارىقتا نەگىزىنەن جەكە كاسىپكەرلەر قالدى. ءبىراق، ولار ساتقان باسىلىمدار سانى ماردىمسىز.

ساۋىتبەك ءابدىراحمانوۆ، ق ر پارلامەنتى ءماجىلىسىنىڭ دەپۋتاتى:

- گازەتكە دەگەن سۇرانىس حالىق تارابىنان ازايۋدا. بۇل جاڭا وزگەرىستەرگە الىپ كەلەدى. تەلەارنا، گازەت، راديو -  اقپارات بەرۋشى ءداستۇرلى مەديا. الەۋمەتتىك جەلى، ينتەرنەت سايتتار بۇل كۇنى بەلەڭ العان جاڭا مەديا ساناتىنا جاتادى. باسىلىمداردىڭ بولاشاعى بۇلىڭعىر ما؟ بۇل وسى نارىقتا جۇرگەندەردى مازالاعان باستى سۇراق بولىپ قالا بەرەدى.

www.24.kz