دەپۋتات 1-قىركۇيەكتەن كەيىن اكەلىنگەن كولىكتەردى دە تىركەپ، جاستارعا جەڭىلدىك جاساۋدى ۇسىندى
«1- قىركۇيەكتەن كەيىن ەلگە كىرگىزىلگەن كولىكتەر شەتتە قالىپ قويدى. قازىر قازاقستاندا گرۋزيا، ارمەنيا، رەسەي جانە قىرعىزستاننان كىرگەن 80 مىڭعا جۋىق كولىك بار. وعان توسقاۋىل قويماساق، ول ءالى دە كىرە بەرەدى. ءبىزدىڭ ءبىرىنشى ۇسىنىسىمىز - وسى شەكارالاس ەلدەردەن كىرىپ جاتقان كولىكتەرگە قاتاڭ باقىلاۋ قويۋ. قوسالقى بولشەكتەرمەن كىرگىزىلگەن، ياعني «كونسترۋكتور» كولىكتەردى كەدەننەن وتكىزۋ كەزىندە تىركەۋ كەرەك. قازىر مۇنىڭ بارلىعى تولىق اۆتوكولىك بولىپ كىرىپ جاتىر. ەندى ول كىرگەن سايىن، كوبەيە بەرەدى. بۇل اۆتوبەلسەندىلەر نارازىلىعىنىڭ ەكىنشى تولقىنىن اكەلىپ سوعۋى مۇمكىن»، - دەدى ناۋرىز سايلاۋباي.
سۇحبات بارىسىندا ول ماسەلەنى شەشۋدىڭ تاعى ءبىر جولىن ۇسىندى. اتاپ ايتقاندا، دەپۋتات 1- قىركۇيەكتەن كەيىن ەلگە اكەلىنگەن 80 مىڭ كولىكتى زاڭداستىرۋ قاجەت ەكەنىن ءمالىم ەتتى.
«ەكىنشى ۇسىنىس - وسى كىرىپ قويعان 80 مىڭ اۆتوكولىكتى زاڭداستىرۋعا تاعى دا ۋاقىت بەرۋ. ءبىز قازىر دەپۋتاتتىق ساۋالدى جولداپ جاتىرمىز. ول بەلگىلى ءبىر ۋاقىتتان كەيىن كەلەدى. سوسىن ونى اۆتوبلوگەرلەرمەن تالقىلايمىز. كەيىن حالىققا قايتا جاريالايمىز. تاعى ءبىر ماسەلە - بۇل كولىكتەردى قاراپايىم حالىق الىپ جاتىر. ارزان، ساپاسى جاقسى. ەندى بۇل جەردە 200-250 مىڭ تەڭگە تابا الماي وتىرعان ادامدار دا بار. سوندىقتان، كولىكتەردى تىركەۋ ءۇشىن كوپبالالى وتباسىلارعا، الەۋمەتتىك وسال توپتارعا جانە 35 جاسقا دەيىنگى جاستارعا %50 جەڭىلدىك بەرسە ەكەن دەيمىز. مىسالى، اۋدان، اۋىلدارعا بارساڭىز، تۇرعىندار 30 جىل بولعان كولىكتەرمەن ءجۇر»، - دەپ توقتالدى دەپۋتات.
ناۋرىز سايلاۋبايدىڭ ايتۋىنشا، 80 مىڭ كولىك - رەسمي دەرەك. ول بەيرەسمي اقپارات بويىنشا ەلگە كىرگىزىلىپ جاتقان اۆتوكولىكتەر ودان دا كوپ بولۋى مۇمكىن ەكەنىن اتاپ ءوتتى.
