اۋانىڭ لاستانۋى ادام ءومىرىن ورتا ەسەپپەن 1 جىلعا قىسقارتادى - ساراپشى
مۇنداي دەرەكتى ەكولوگيالىق ۇيىمدار قاۋىمداستىعىنىڭ باسقارما ءتوراعاسى ايگۇل سولوۆيەۆا كەلتىردى، دەپ حابارلايدى قازاقپارات ءتىلشىسى.
بىشكەكتە ءوتىپ جاتقان دەنساۋلىق ساقتاۋ جونىندەگى حالىقارالىق كونفەرەنسيا بارىسىندا ايگۇل سولوۆيەۆا اۋانىڭ لاستانۋى ادام ءومىرىن ورتا ەسەپپەن 1 جىلعا قىسقارتاتىندىعىن اتاپ ءوتتى.
«دۇنيەجۇزىلىك دەنساۋلىق ساقتاۋ ۇيىمىنىڭ ەسەبىنە سايكەس، 2019 -جىلى اۋانىڭ لاستانۋى بۇكىل الەم بويىنشا 8,8 ميلليونعا جۋىق ادامنىڭ ءومىرىن قيدى. وستيندەگى تەحاس ۋنيۆەرسيتەتى عالىمدارىنىڭ دەرەگىنشە، اۋانىڭ جاھاندىق لاستانۋى ادامنىڭ ءومىر ءسۇرۋ ۇزاقتىعىن ورتا ەسەپپەن ءبىر جىلعا قىسقارتادى»، - دەدى ول كونفەرەنسيا بارىسىندا.
سپيكەر وزگە دە ستاتيستيكالىق دەرەكتەردى كەلتىردى. ماسەلەن، دۇنيەجۇزىلىك بانكتىڭ مالىمەتىنشە، قازاقستاننىڭ تەك ءتورت وڭىرىندە - الماتى، قاراعاندى، پاۆلودار جانە شىعىس قازاقستان وبلىستارىندا اۋانىڭ لاستانۋىنان جىل سايىن سوزىلمالى ءبرونحيتتىڭ 1016 جاڭا جاعدايى تىركەلىپ، 2040 ادام اۋرۋحاناعا جاتقىزىلادى. جەدەل مەديتسينالىق كومەككە 40 مىڭنان استام ادام جۇگىنەدى. مۇنان بولەك، 2848 ادام مەزگىلسىز ومىردەن وزسا، جۇرەك- وكپە اۋرۋلارىنان 2665 ءولىم، وكپە وبىرىنان 183 ءولىم تىركەلەدى.
«2011 -جىلى كەيبىر قالادا اتموسفەرالىق اۋانىڭ لاستانۋىنان تۋىنداعان مەزگىلسىز ءولىم- ءجىتىمدى ەسەپكە الماعاندا، لاستانعان اۋانىڭ حالىقتىڭ دەنساۋلىعىنا اسەر ەتۋىنەن بولعان زالال الماتىدا - 486 ميلليون، پاۆلوداردا - 181 ميلليون وسكەمەندە - 157 ملن، تەمىرتاۋدا 154 ميلليون دوللاردى قۇرادى. اۋانىڭ لاستانۋىنان تۋىنداعان اۋرۋلاردىڭ سالدارىنان رەسپۋبليكالىق زالال جىل سايىن 2,5 ميلليارد دوللارعا جەتەدى. بۇل - جالپى ىشكى ءونىمنىڭ 1,7 پايىزى»، - دەدى ايگۇل سولوۆيەۆا.
ونىڭ پايىمىنشا، حالىققا ساپالى جانە شىنايى ەكولوگيالىق اقپارات ۇسىنۋ قورشاعان ورتانى قورعاۋ سالاسىنداعى ساياساتتىڭ نەگىزگى باعىتتارىنىڭ ءبىرى بولۋى ءتيىس.