ەلوردانىڭ 1 تريلليون تەڭگەدەن استام بيۋدجەتى قايدا جۇمسالادى
ناقتى تۇسىمدەر تالداۋىنا سايكەس، جەكە كىرىستەر بويىنشا جوسپاردى 71,5 ميلليارد تەڭگەگە دەيىن ۇلعايتۋ ۇسىنىلىپ وتىر. ونىڭ ىشىندە سالىقتىق تۇسىمدەر بويىنشا 60 ميلليارد تەڭگەگە، سالىقتىق ەمەس تۇسىمدەر بويىنشا 9,5 ميلليارد تەڭگەگە ارتتىرۋ ۇسىنىلدى.
«شىعىستارعا كەلسەك، بىرىنشىدەن مەملەكەتتىڭ الەۋمەتتىك مىندەتتەمەلەرىن ورىنداۋدىڭ باسىمدىلىعىن نەگىزگە الا وتىرىپ، الەۋمەتتىك سالانى قارجىلاندىرۋ ماسەلەلەرى ەرەكشە تارتىپپەن قارالادى. ماسەلەن، الەۋمەتتىك سالاعا شامامەن 17,4 ميلليارد تەڭگە باعىتتالعان. بۇل مەديتسينالىق الەۋمەتتىك مەكەمەلەردە قارتتار مەن مۇگەدەكتىگى بار جاندار ءۇشىن ارناۋلى الەۋمەتتىك قىزمەتتەر كورسەتۋگە، جەكە كومەكشى قىزمەتتەرىنە اقى تولەۋگە، مۇگەدەك بالالاردى تاسىمالداۋعا ارنالعان ينۆوتاكسي سانىنىڭ ۇلعايۋىنا بايلانىستى. دەنساۋلىق ساقتاۋ سالاسىندا - تۇماۋعا جانە ا گەپاتيتىنە قارسى ۆاكتسينالاردى ساتىپ الۋعا، قالالىق ەمحانالاردى كۇردەلى جوندەۋگە، تەگىن مەديتسينالىق كومەكتىڭ كەپىلدىك بەرىلگەن كولەمىن قامتاماسىز ەتۋگە، ءبىلىم بەرۋ سالاسىندا - وقۋ پروتسەسىنە سايكەس، كىتاپتاردى جىل سايىن جاڭارتۋعا، جاڭا ورىندارعا بالاباقشالاردى جان باسىنا قارجىلاندىرۋعا، كوللەدجدەردى جاراقتاندىرۋعا جانە بالاباقشالارداعى تۋرنيكەتتەردى جاراقتاندىرۋعا بايلانىستى»، - دەپ ءتۇسىندىردى قايسار مانقارايەۆ بۇگىنگى ءماسليحات وتىرىسىندا.
ەكىنشىدەن، قاراجاتتىڭ ەداۋىر كولەمى تىنىس- تىرشىلىكتى قامتاماسىز ەتۋ ينفراقۇرىلىمىن نىعايتۋعا، جول- كولىك جەلىسىن ۇستاۋعا جانە دامىتۋعا باعىتتالادى. قالا كوشەلەرىنىڭ قۇرىلىسىن باستاۋ جانە جالعاستىرۋ، ورتاشا جوندەۋ، قوعامدىق كولىك تاسىمالداۋشىلارىنىڭ شىعىندارىن سۋبسيديالاۋ، باعدارشام وبەكتىلەرىنىڭ قۇرىلىسىن جالعاستىرۋ، نوسەر كارىزىن كۇتىپ- ۇستاۋ، تازارتۋ، كوممۋنالدىق تۇرعىن ءۇي قورىنىڭ تۇرعىن ءۇي جوبالاۋ مەن سالۋ، رنەكونسترۋكتسيالاۋ، قالانى كوگالداندىرۋ مەن اباتتاندىرۋ جۇمىستارى جالعاسادى.
سونداي- اق، جاڭادان قۇرىلعان نۇرا اۋدانى اكىمى اپپاراتى قىزمەتىن قامتاماسىز ەتۋگە قاراجات قاراستىرىلعان.
«ۇشىنشىدەن، قارجىلاندىرۋ قالانى دامىتۋ ءۇشىن قاجەتتى جەكەلەگەن ءىس- شارالارعا دا كوزدەلگەن. قالالىق مونيتورينگ جانە جەدەل دەن قويۋ ورتالىعى قىزمەتكەرلەرىنە ەڭبەكاقى تولەۋگە، يننوۆاتسيالىق قىزمەتتى دامىتۋدى قامتاماسىز ەتۋ جونىندەگى قىزمەتتەرگە ارنايى تەحنيكا ساتىپ الۋعا، جەر ۋچاسكەلەرىن ساتىپ الۋعا، 16 كوپپاتەرلى تۇرعىن ءۇي كەشەنىندە كۇردەلى جوندەۋ وتكىزۋگە، 5 كوپپاتەرلى تك 10 ليفتىن اۋىستىرۋعا قارجى باعىتتالعان. وسىلايشا، ەنگىزىلگەن وزگەرىستەردى ەسكەرە وتىرىپ، استانا قالاسىنىڭ 2023 -جىلعا ارنالعان تۇزەتىلگەن جانە ناقتىلانعان بيۋدجەتىنىڭ جالپى كولەمى 1 تريلليون 120 ميلليارد 955 ميلليون تەڭگە بولادى. ونىڭ ىشىندە جەكە كىرىستەر بويىنشا تۇسىمدەر 635 ميلليارد 242 ميلليون تەڭگەگە تەڭ»، - دەدى ق. مانقارايەۆ.
