عىلىم مينيسترلىگى 1 ميلليون وقۋشىنى كاسىبي دياگنوستيكادان وتكىزبەكشى
جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى اقەركە ابىلايحان ورتالىق كوممۋنيكاتسيالار قىزمەتىندە وتكەن بريفينگىدە وسىنداي مالىمەت ايتتى، دەپ حابارلايدى قازاقپارات ءتىلشىسى.
«جوبانى قولداپ وتىر. جالپى بۇگىندە بۇكىل مەكتەپتەردە كاسىبي باعدارلاۋشى ءبىر مامان وسى ماسەلەمەن تىكەلەي اينالىسادى. ياعني، جاس بۋىننىڭ كەلەشەك ماماندىعىن دۇرىس تاڭداۋىنا ىقپال ەتۋ وتە ماڭىزدى. سوندىقتان ءبىزدىڭ مينيسترلىك تاراپىنان «ماماندىعىم - بولاشاعىم» جوباسى ىسكە اسىرىلادى. وسى جوبانىڭ شەڭبەرىندە دە 1 ميلليونعا جۋىق مەكتەپ وقۋشىسىن كاسىبي دياگنوستيكادان - تەستىلەۋدەن وتكىزۋ جوسپارلانىپ وتىر. سەبەبى كەز كەلگەن اتا-انانىڭ كوكەيىندە جۇرگەن سۇراقتاردىڭ ءبىرى - «مەنىڭ بالامنىڭ قابىلەتى قانداي؟». بۇل جەردە ءار بالانىڭ ەرەكشە قابىلەتىن ەسكەرىلەدى. سوندىقتان عىلىمي تۇرعىدان جاسالعان جۇيە بويىنشا دياگنوستيكالىق تەستىلەۋ جوسپارلانىپ وتىر»، - دەدى ول «بولاشاق» قاۋىمداستىعىنىڭ «بولاشاققا سەنىممەن» اتتى جوباسىنا ارنالعا بريفينگىدە.
«بولاشاق» قاۋىمداستىعى كەڭەسىنىڭ مۇشەسى مۇحتار مانكەيەۆتىڭ ايتۋىنشا، كاسىبي باعدارلاۋ جۇمىسى ا ق ش، گەرمانيا، شۆەتسيا، جاپونيا سياقتى ەلدەردە وتكەن عاسىردىڭ ورتاسىنان بەرى جولعا قويىلعان. قاۋىمداستىق وكىلى سولاردىڭ ىشىندە جاپونيانىڭ تادجىريبەسى قازاقستانعا جاقىن دەگەن پايىمىن ايتتى.
«قازاقستانعا كەلەتىن بولساق، ءبىزدىڭ ويىمىزشا، جاپونيانىڭ تاجىريبەسى بىزگە جاقىن. ولار كاسىپتىك باعدار بەرۋ تۇجىرىمداماسىن جاپون مەكتەبىنىڭ جۇيەسىن تۇەگەيلى رەفورمالاۋ اياسىندا ەنگىزگەن بولاتىن. ولار 7-9- سىنىپ وقۋشىلارىنىڭ اراسىندا جىل سايىن 16 ءتۇرلى ماماندىق بويىنشا جۇمىس ىستەيدى. سوندا ولار مەكتەپ بىتىرگەنگە دەيىن 48 ماماندىق بويىنشا باقتارىن سىناپ كورەدى دەگەن ءسوز. وسىلايشا ولار ءار باعىت بويىنشا ەمتيحان تاپسىرىپ، قاي سالاعا بەيىمى بار، قاي باعىتتاعى ءبىلىمى ساپالى ەكەنىن بىلەدى. سوندىقتان دا بۇگىن بىزدەن قازاقستان بويىنشا وسىنداي ۇلكەن جوبا قاۋىمداستىقتىڭ اتىنان باستاپ جاتىرمىز. ءقازىر ەكى مينيسترلىكپەن تىعىز جۇمىس ىستەپ وتىرمىز»، - دەدى مۇحتار مانكەيەۆ.
