ءۇندىستاننىڭ امبرونول جانە دوك-1 ماكس پرەپاراتتارى قاۋىپتى - د د س ۇ

None
باكۋ. قازاقپارات - دۇنيەجۇزىلىك دەنساۋلىق ساقتاۋ ۇيىمى (د د س ۇ) وزبەكستاندا بالالاردىڭ ولىمىنە اكەپ سوقتىرعان ءۇندىستان پرەپاراتتارىنىڭ قاۋىپتىلىگى تۋرالى ەسكەرتتى، دەپ حابارلايدى قازاقپارات ءتىلشىسى ۇيىمعا سىلتەمە جاساپ.

ماسەلە ءۇندىستاندا Marion Biotech LTD فارماتسيەۆتيكالىق كومپانياسى شىعارعان امبرونول جانە دوك-1 Makc ءشارباتتارى تۋرالى بولىپ وتىر.

د د س ۇ بۇل ونىمدەر ساپا ستاندارتتارىنا سايكەس كەلمەيتىنىن ايتۋدا. سەبەبى وسى ۋاقىتقا دەيىن ءوندىرۋشى اتالعان ۇيىمعا ونىمدەردىڭ قاۋىپسىزدىگى مەن ساپاسىنا كەپىلدىك بەرەتىن قۇجاتتار ۇسىنباعان.

وزبەكستان دەنساۋلىق ساقتاۋ مينيسترلىگى ەكى ءونىمنىڭ ۇلگىلەرىنە زەرتحانالىق تالداۋ جاساپ، ەكەۋىنىڭ قۇرامىندا رۇقسات ەتىلمەيتىن مولشەردە ديەتيلەنگليكول جانە/نەمەسە ەتيلەنگليكول بار ەكەنىن انىقتادى.

بۇل دارىلەردىڭ قۇرامىنداعى ۋىتتى زاتتار اسەرىنەن ءىش اۋىرۋ، قۇسۋ، ديارەيا، ءزار شىعارۋدىڭ بۇزىلۋى، باس اۋرۋى، پسيحيكالىق جاعدايدىڭ وزگەرۋى جانە بۇيرەكتىڭ ولىمگە اكەلەتىن وتكىر سىرقاتى بولۋى مۇمكىن.

د د س ۇ اتالعان دارىلەردىڭ باسقا ەلدەرگە نەمەسە وڭىرلەرگە بەيرەسمي نارىق ارقىلى تارالۋى مۇمكىن ەكەنىن جوققا شىعارمايدى.

د د س ۇ ءتيىستى مەديتسينالىق مەكەمەلەردى قاداعالاۋدى كۇشەيتۋگە جانە جەتكىزىلىم تىزبەگىندە ساقتىق تانىتۋعا، سونداي-اق پاتسيەنتتەرگە زيان كەلتىرمەۋ ءۇشىن وسى ساپاسىز ونىمدەردى انىقتاپ، اينالىمنان شىعارۋعا شاقىردى.

ەسكە سالايىق، وزبەكستاندا وتكەن جىلدىڭ قىركۇيەك- جەلتوقسان ايلارىندا 19 ادامنىڭ ءولىمى تىركەلگەن ەدى. وعان ۇندىلىك Marion Biotech كومپانياسى شىعارعان دوك-1 Makc پرەپاراتىن قابىلداۋ سەبەپ بولعان. زارداپ شەككەندەردىڭ بارلىعى - التى جاسقا تولماعان بالالار.

7-قاڭتاردا جوعارىدا اتالعان سيروپتى ىشكەن تاعى ءبىر بالانىڭ قايتىس بولعانى بەلگىلى بولدى.


سوڭعى جاڭالىقتار