ءاليحان سمايىلوۆ 1 اي ىشىندە حالىقتىڭ تابىسىن ارتتىرۋ باعدارلاماسىن وزەكتەندىرۋدى تاپسىردى

بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«پرەزيدەنت جارلىعىمەن بەكىتىلگەن مەملەكەت باسشىسىنىڭ سايلاۋالدى باعدارلاماسىن ىسكە اسىرۋ جونىندەگى ءىس- قيمىل جوسپارىنىڭ ءىس-شارالارىن مينيسترلىكتەردىڭ سالالىق تۇجىرىمدامالارى مەن دامۋ جوسپارلارىنا قوسۋ كەرەك. ءبىز ولاردى كەلەسى جىلدىڭ باسىندا بەكىتەمىز»، - دەدى ۇكىمەت باسشىسى.

ءاليحان سمايىلوۆ ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن بىرلەسىپ، اكىمشىلىك رەفورما اياسىندا مەملەكەتتىك باسقارۋ دەڭگەيلەرى اراسىندا فۋنكتسيالاردى قايتا ءبولۋ ارقىلى زاڭنامالىق اكتىلەردى جۇيەلى تەكسەرۋدى اياقتاۋى تيىستىگىن باسا ايتتى.

«ءتيىستى زاڭ جوباسىن ازىرلەپ، ونى 2023 -جىلدىڭ 1-ناۋرىزىنا دەيىن ماجىلىسكە ەنگىزۋ كەرەك. قازىرگى سىن-قاتەرلەردى ەسكەرە وتىرىپ، ءبىر اي ىشىندە ينفلياتسيانى باقىلاۋ جانە تومەندەتۋ جونىندەگى ءىس-شارالار كەشەنىن جاڭارتۋ قاجەت. سونىمەن قاتار، ءبىر اي ىشىندە حالىقتىڭ تابىسىن ارتتىرۋ باعدارلاماسىن وزەكتەندىرۋ كەرەك. «قاراپايىم زاتتار ەكونوميكاسى» باعدارلاماسى اياسىندا سىياقى ستاۆكالارىن سۋبسيديالاۋ مەرزىمىن 7 جىلعا دەيىن ۇزارتۋدى قاراستىرۋ قاجەت»، - دەدى ول.

ونىڭ اتاپ وتۋىنشە، ۇلتتىق ەكونوميكا مينيسترلىگى ۇلتتىق بانكپەن، قارجى نارىعىن رەتتەۋ جانە دامىتۋ اگەنتتىگىمەن بىرلەسىپ، تۇتىنۋشىلىق كرەديت بەرۋ كولەمىن قىسقارتۋ ءىس-شارالارىن ازىرلەۋى ءتيىس.

«اۋىل شارۋاشىلىعى مينيسترلىگىمەن بىرلەسىپ، 2023 -جىلعى 1-اقپانعا دەيىن اۋىلدىق اۋماقتاردى دامىتۋدىڭ 2023- 2027 -جىلدارعا ارنالعان تۇجىرىمداماسىنىڭ جوباسىن ازىرلەپ، پرەمەر-مينيستر كەڭسەسىنە ەنگىزسىن. سونداي-اق، اكىمدىكتەردىڭ قۇرىلىمدارى بويىنشا، ونىڭ ىشىندە اكىمدەر ورىنباسارلارىنىڭ سانى بويىنشا قازىرگى شتاتتىق ليميت شەگىندە اكىمدەرمەن كەلىسىلگەن پوزيتسيانى ەنگىزۋ كەرەك»، - دەدى ءاليحان سمايىلوۆ.