جىل سوڭىنا دەيىن 1 مىڭ شاقىرىم جول پايدالانۋعا بەرىلمەك
«مەملەكەت باسشىسىنىڭ تاپسىرماسىنا سايكەس، ءبىز بۇرىن باستالعان بارلىق جوبالاردى اياقتاۋىمىز قاجەت. بۇگىندە ەلىمىزدەگى اۆتوجول سالاسىنداعى ونداي جوبالاردىڭ سانى 17 گە جەتتى. وسى ورايدا ىسكە اسىرىلۋى 2024 -جىلعا دەيىن جوسپارلانعان 4 مىڭ شاقىرىم جول جەلىسى بار. جىل سوڭىنا دەيىن شامامەن 1 مىڭ شاقىرىم جولدى پايدالانۋعا بەرۋ جوسپارلانىپ وتىر»، - دەدى ق. وسكەنبايەۆ.
ونىڭ ايتۋىنشا، قالعان 3 مىڭ شاقىرىم جولداعى جۇمىستاردى 2023 -جىلى اياقتاۋ ەسكەرىلگەن.
«وسى رەتتە نەگىزگى ىسكە اسىرىلىپ جاتقان جوبالارعا توقتالايىن. «ورتالىق - وڭتۇستىك» باعىتىندا 2024 -جىلدىڭ سوڭىنا دەيىن جالپى ۇزىندىعى 1208 شاقىرىم بولاتىن «قاراعاندى - بالقاش - بۋرىلبايتال - قۇرتى - قونايەۆ» جانە «مەركە - بۋرىلبايتال» جوبالارى اياقتالادى. «قاراعاندى - بالقاش - بۋرىلبايتال - قۇرتى - قونايەۆ» ۋچاسكەسىنىڭ جالپى ۇزىندىعى - 946 شاقىرىم. بۇگىندە ونداعى 428 شاقىرىمدا قوزعالىس اشىلدى. جىلدىڭ سوڭىنا دەيىن قوسىمشا 106 شاقىرىمدا قوزعالىس اشىلادى. قالعان 412 شاقىرىمدى 2023 -جىلى اياقتايمىز»، - دەدى مينيستر.
ونىڭ سوزىنە قاراعاندا، جىل سوڭىندا ۇزىندىعى 262 شاقىرىم «مەركە - بۋرىلبايتال» ۋچاسكەسىندە قوزعالىس تولىق اشىلادى. قازىرگى كەزدە ونداعى 158 شاقىرىم جولدا كولىك قوزعالىسى قامتاماسىز ەتىلگەن. قالعان 104 شاقىرىم جولدا قۇرىلىس جۇمىستارى جۇرگىزىلىپ جاتىر.
«ەلىمىزدىڭ شىعىس وڭىرلەرىندە جالپى ۇزىندىعى 1363 شاقىرىمدا 3 ءىرى جوبا ىسكە اسىرىلىپ جاتىر. ولاردىڭ اراسىندا «تالدىقورعان - وسكەمەن»، «قالباتاۋ - مايقاپشاعاي»، «ءۇشارال - دوستىق» جولدارى بار. كەلەسى جىلى بارلىق وسى ۋچاسكەلەر بويىنشا قۇرىلىس- مونتاجداۋ جۇمىستارى اياقتالادى»، - دەدى ۆەدومستۆو باسشىسى.
اتاپ ايتقاندا، جالپى ۇزىندىعى 768 شاقىرىم «تالدىقورعان - وسكەمەن» ۋچاسكەسىنىڭ 649 شاقىرىمىندا قوزعالىس اشىلدى. قالعان 119 شاقىرىم جول 2023 -جىلى تاپسىرىلادى.
سونىمەن قاتار، 415 شاقىرىم بولاتىن «قالباتاۋ - مايقاپشاعاي» ۋچاسكەسىندەگى 159 شاقىرىم جولدا قوزعالىس اشىلدى. جىلدىڭ اياعىنا دەيىن تاعى 15 شاقىرىم قوسىلادى. قالعان 241 شاقىرىم جول كەلەسى جىلى پايدالانۋعا بەرىلەدى.
جالپى ۇزىندىعى 180 شاقىرىم «ءۇشارال - دوستىق» ۋچاسكەسىندەگى 155 شاقىرىم جولدا قوزعالىس اشىلدى. ال، 25 شاقىرىم جولداعى قۇرىلىس جۇمىستارى 2023 -جىلى اياقتالادى.
ايتا كەتەيىك، 2025 -جىلى رەسپۋبليكالىق جەلى بويىنشا نورماتيۆتىك جاعدايداعى جولداردىڭ ۇلەسى 100 پايىزعا دەيىن جەتكىزىلمەك.
اۆتور
رۋسلان عابباسوۆ
