قايتىس بولعان الماتىلىقتىڭ شوتىنان 1 ميلليارد تەڭگەنى جىمقىرماق بولعاندار سوتتالدى
الماتى. قازاقپارات - مەدەۋ اۋداندىق سوتى جالعان قۇجاتتار نەگىزىندە مارقۇم بولعان الماتىلىقتىڭ بانكتىك شوتىنان 1 ميلليارد تەڭگە مولشەرىندەگى «بەرەشەكتى» ءوندىرىپ الۋ تۋرالى تالاپ ارىز بەرگەن الاياقتارعا قاتىستى ۇكىم شىعاردى، دەپ حابارلايدى قازاقپارات ءتىلشىسى.
قالالىق پروكۋراتۋرا مالىمەتىنشە، ەكى ادام قايتىس بولعان الماتىلىق تۇرعىننىڭ قارىزى بار دەپ سوتقا ارىزدانعان. ولار جالعان قۇجات جاساپ، سوتتا جەڭىسكە جەتكەن. الايدا، ءىس جۇزىندە جابىرلەنۋشىدە ەشقانداي قارىز مىندەتتەمەسى بولماعان.
«جەكە سوت ورىنداۋشىسىنىڭ وكىمى ناتيجەسىندە بانك اقشا قاراجاتىن ءوندىرىپ الۋشىعا اۋدارۋ ماقساتىندا سوت ورىنداۋشىسىنىڭ اعىمداعى شوتىنا تۇسىرگەن. الايدا، مارقۇمنىڭ ايەلى دەر كەزىندە الاياقتاردىڭ قىلمىستىق ارەكەتتەرىنىڭ جولىن كەستى. ول قۇقىق قورعاۋ ورگاندارىنا جۇگىنگەن، سول ارقىلى كىنالىلەر قىلمىستىق ارەكەتتەرىن اياقتاي المادى. سوتالدى تەرگەپ- تەكسەرۋ بارىسىندا جانە سوتتا مارقۇمنىڭ ءىس جۇزىندە ەشكىمنىڭ الدىندا ەشقانداي قارىز مىندەتتەمەسى بولماعانى انىقتالدى»، - دەپ حابارلادى پروكۋراتۋرادان.
سوت الاياقتاردى ءتۇرلى مەرزىمگە سوتتادى.
