حالىقارالىق ارميا ويىندارى: قازاقستان «بەيبىتشىلىك جاۋىنگەرى» سايىسىندا 1-ورىن الدى
ديليجان پوليگونىندا (ارمەنيا) قازاقستاندىق كوماندا (اعا سەرجانتتار دارحان اسلان، بەكتورە نازاشوۆ، تۇرار تىلەگەنوۆ جانە قاتارداعى جاۋىنگەر نازيرا ءالبوسىنوۆا) ارمەنيا، بەلارۋس جانە رەسەي ەلىنەن قاتىسقان قارسىلاستارىن باسىپ وزدى.
سايىستىڭ ناتيجەسى «راتنيك» قورىتىندى كەزەڭىندە شەشىلدى. قازاقستاندىق اسكەري قىزمەتشىلەر ەرلەر اراسىنداعى اسكەري-قولدانبالى پاندەر جارىسىندا دا جەڭىسكە جەتتى. قاتارداعى جاۋىنگەر نازيرا ءالبوسىنوۆا اسكەري-مەديتسينالىق جارىستا ۇزدىك ناتيجە كورسەتىپ، اتىس دايارلىعىنىڭ جاتتىعۋلارىن ءساتتى ورىنداپ شىقتى. بۇل كەزەڭدەگى جەڭىس قازاقستاندىق كومانداعا بايقاۋ تۇعىرىنىڭ جوعارى ساتىسىنا كوتەرىلۋگە مۇمكىندىك بەردى. جالپىكوماندالىق ەسەپتە ەكىنشى ورىندى رەسەي اسكەري قىزمەتشىلەرى ەنشىلەپ، بەلارۋس ەلىنىڭ وكىلدەرى ۇزدىك ۇشتىككە ەندى.
ازەربايجان رەسپۋبليكاسىنداعى اسكەري تەڭىزشىلەردىڭ «تەڭىز كۋبوگى» بايقاۋىنىڭ سايىستارى دا اياقتالدى. بارلىق كەزەڭدەردىڭ قورىتىندىسى بويىنشا قازاقستاندىق كوماندا 2-ورىندا تۇر. ءبىرىنشى ورىندى ازەربايجان مەن رەسەيدىڭ اسكەري قىزمەتشىلەرى ءوزارا ءبولىستى.
كاباردينو-بالكاريادا ءوتىپ جاتقان «ەلبرۋس شەڭبەرى» بايقاۋىندا قازاقستاندىق اسكەري قىزمەتشىلەر جاتتىعۋلاردى ورىنداۋدان رەسەي مەن وزبەكستان جاۋىنگەرلەرىنەن ءسال ارتتا قالىپ، 3-ورىنعا تۇراقتادى. ءتورتىنشى جانە بەسىنشى ورىنداردى قىتاي مەن ءۇندىستان كوماندالارى يەلەندى. بايقاۋ ناتيجەلەرى كوماندالار اراسىنداعى سوڭعى جارىس - ەلبرۋس شىڭىنا شىعۋدان سوڭ انىقتالادى.
ماسكەۋ ماڭىنداعى «الابينو» پوليگونىندا قازاقستاندىق تانكيستەر «تانك بياتلونى» بايقاۋىنىڭ اقتىق مارەسىنە وتپەي قالدى. قازاقستان قۇراماسى مارەگە جەتەر الدىندا قىتاي كومانداسىنا جول بەرىپ، حالىقارالىق ارميا ويىندارىنىڭ جابىلۋ كۇنى وتەتىن فينالعا شىقپايتىن بولدى.
بۇعان دەيىن قازاقستان اسكەريلەرى «ارتيللەريادان وق اتۋ شەبەرلەرى»، «مەريديان» جانە «تاكتيكالىق مەرگەن» بايقاۋلارىندا جەڭىسكە جەتكەن ەدى.
