تۋريزمدەگى باعا باسەكەلەستىگى: قازاقستان جاھاندىق رەيتينگىدە 1-ورىن الدى
بۇل تۋرالى ق ر مادەنيەت جانە سپورت مينيسترلىگىنىڭ سايتىندا ءمالىم ەتىلدى، دەپ حابارلايدى قازاقپارات.
«دۇنيەجۇزىلىك ەكونوميكالىق فورۋمنىڭ مالىمەتى بويىنشا تۋريزمنىڭ جاھاندىق رەيتينگىندە قازاقستان 2021-جىلى ءوز پوزيتسياسىن جاقسارتىپ، 117 ەلدىڭ اراسىندا 66-ورىندى يەلەندى (2019-جىلى 140 ەلدىڭ ىشىندە 80-ورىن). ەلىمىز «باعا بويىنشا باسەكەگە قابىلەتتىلىك» ( 1-ورىن)، «تۋريزمنىڭ ماۋسىمدىلىعى» (26-ورىن)، «تابيعي رەسۋرستار» (33-ورىن)، «يۋنەسكونىڭ دۇنيەجۇزىلىك مادەني مۇرا وبەكتىلەرىنىڭ سانى» (42-ورىن) كورسەتكىشتەرى بويىنشا جوعارى باعا الدى»، - دەلىنگەن ۆەدومستۆو حابارلاماسىندا.
ۇسىنىلعان اقپاراتقا سايكەس، 2021-جىلى قازاقستاندا ىشكى تۋريستەر سانى رەكوردتىق دەڭگەيگە جەتتى - تىركەلگەن ادامدار سانى شامامەن 7 ميلليون. العاشقى جارتى جىلدا شۋچينسك-بۋراباي كۋرورت ايماعىنا 550 مىڭ ادام بارعان. بۇل وتكەن جىلدىڭ سايكەس كەزەڭىمەن سالىستىرعاندا 2 ەسە كوپ. جازعى ماۋسىمدا «شىمبۇلاققا» 240 مىڭعا جۋىق ادام ساياحاتتاپ، بىلتىرعى ماۋسىمعا قاراعاندا 90 مىڭعا كوپ ادام بارعان.
مينيسترلىك ناقتى كورسەتكىشتەردى ماۋسىم اياقتالعاننان كەيىن جاريالاۋعا ۋادە ەتىپ وتىر.
ال ۇلتتىق پاركتەرگە بيىل 2 ميلليونعا جۋىق ادام بارادى دەگەن بولجام بار.
وسىلايشا، 2022-جىلدىڭ ءبىرىنشى توقسانىندا: - ورنالاسۋ نىساندارىنا جايعاسقان ىشكى تۋريستەر سانى %21,5 ارتىپ، 1,13 ميلليون ادامدى قۇرادى؛
- ورنالاسۋ نىساندارى 26,3 ميلليارد تەڭگە كولەمىندە قىزمەت كورسەتتى، بۇل 2021-جىلعى ءبىرىنشى توقسانمەن سالىستىرعاندا %25,7 كوپ؛
- اپتا سايىن قازاقستانعا كەمىندە 11 مىڭ شەتەلدىك تۋريست كەلەدى.
