اتىراۋ وبلىسىندا 1 مىڭنان استام ەدىلباي تۇقىمدى قوي تىرىدەي جانىپ كەتتى
ءورت قۇرمانعازى اۋدانىنىڭ سۇيىندىك اۋىلدىق وكرۋگىنە قاراستى جالعىزاپان اۋىلىنا جاقىن ماڭىندا بولعان.
جالىننان «سۇيىندىك قوي زاۋىتى» ج ش س- ءنىڭ 1 مىڭنان استام ەدىلباي تۇقىمدى قويى تىرىدەي جانىپ كەتكەن.
اۋىل تۇرعىندارىنىڭ ايتۋىنشا، ءورت رەسەي فەدەراتسياسىنداعى استراحان وبلىسىنىڭ اۋماعىندا تۇتانعان. كەيىن اتىراۋ وبلىسىنا جايىلعان.
سەرىكتەستىكتىڭ شوپانى ءۋاليحان قابدراحمانوۆتىڭ ايتۋىنا قاراعاندا، ۇيىنە جاقىنداعان كەزدە جەل كۇشەيىپ، ءورت ورشىگەن.
«ءوزىم بالالار جاتقان ۇيگە ارەڭ جۇگىرىپ جەتتىم. ءۇيدىڭ اينالاسىنداعى ءشوپ جانىپ كەتتى. سونىڭ سالدارىنان 1039 قويدان ايىرىلدىم. ونىڭ ىشىندە ءوز يەلىگىمدەگى مالىم دا بار»، - دەيدى ءۋاليحان قابدراحمانوۆ.
قۇرمانعازى اۋدانىنىڭ توتەنشە جاعدايلار ءبولىمىنىڭ مالىمەتىنشە، قۇرعاق ءشوپ ورتەنگەن. رەسەي فەدەراتسياسىنىڭ اۋماعىنان تاراعان ءورتتى سوندىرۋگە 30 ادام مەن 4 تەحنيكا تارتىلعان.
جالىندى اۋىزدىقتاۋعا سۇيىندىك جانە جالعىزاپان اۋىلدارىنىڭ تۇرعىندارى دا اتسالىسقان.
«قۇرعاق ءشوپتىڭ ورتەنۋىنەن «سۇيىندىك قوي زاۋىتى» ج ش س- ءنىڭ 1 مىڭنان استام ەدىلباي تۇقىمدى قويى جانىپ كەتتى. سوڭعى اپتادا اۋىل ماڭىندا ءۇش رەت ءورت تىركەلدى. ورتكە كۇننىڭ قاتتى ىسۋى سەبەپ بولىپ وتىر»، - دەيدى سۇيىندىك اۋىلدىق وكرۋگىنىڭ اكىمى قانات قۇلشاروۆ.
ورتەنگەن 1 مىڭنان استام قويدىڭ ولەكسەسى جالعىزاپان اۋىلى ماڭىنان قازىلعان شۇڭقىرعا كومىلگەن. قازىر ورتتەن كەلگەن شىعىن كولەمى ەسەپتەلىپ جاتىر.
ەدىلباي تۇقىمدى قويىنىڭ سالماعى 145 كەلىگە دەيىن تارتادى. ءتورت ايلىق قوزىسىنىڭ سالماعى - 40-45 كەلى. بۇل قۇيرىقتى ءارى ەتتى قوي تۇقىمىنا جاتادى.
ەسكە سالا كەتەلىك، بۇعان دەيىن اتىراۋدا ەكى كۇندە «گاۋحارتاس» تۇرعىن ءۇي كەشەنىنەن ءۇش رەت ءورت شىققانىن حابارلاعان بولاتىنبىز.
