قازاقستان تاۋەلسىزدىك جىلدارى 1 ميلليارد تونناعا جۋىق كومىردى شەتەلگە ەكسپورتتادى
نۇر- سۇلتان. قازاقپارات - قازاقستان وتكەن جىلى 30,5 ميلليون توننا كومىردى ەكسپورتقا شىعاردى.
بۇل تۋرالى كومىر ونەركاسىبى فورۋمىندا ق ر ي ي د م يندۋستريالىق دامۋ كوميتەتى ءتوراعاسىنىڭ ورىنباسارى تۇرار جولماعامبەتوۆ ايتتى، دەپ حابارلايدى قازاقپارات ءتىلشىسى.
«2021 -جىلدىڭ قورىتىندىسىندا ەلىمىزدىڭ كومىر ءوندىرۋشى كومپانيالارى 111,7 ميلليون توننا كومىر ءوندىردى. بۇل وتكەن جىلدىڭ كورسەتكىشىمەن سالىستىرعاندا 2 پايىزعا جوعارى. ەنەرگيا وندىرەتىن كاسىپورىندارعا 59,3 ميلليون توننا كومىر جونەلتىلدى. 6,8 ميلليون توننا كومىر ونەركاسىپتىك كاسىپورىندارعا جەتكىزىلدى. حالىق پەن كوممۋنالدىق- تۇرمىستىق قاجەتتىلىككە 10,7 ميلليون توننا كومىر بەرىلدى. كومىر ەكسپورتى 30,5 ميلليون توننانى قۇرادى. بۇل وتكەن جىلمەن سالىستىرعاندا 2 پايىزعا كوپ»، - دەدى تۇرار جولماعامبەتوۆ.
ونىڭ دەرەگىنشە، رەسپۋبليكادا ەنەرگەتيكالىق جانە حالىق پەن كوممۋنالدىق- تۇرمىستىق قاجەتتىلىككە ارنالعان كومىردى شامامەن 30 كومپانيا وندىرەدى.
«بۇگىندە ەلىمىزدىڭ كومىر سالاسى ەلەكتر ەنەرگياسىن ءوندىرۋدىڭ 70 پايىزىن، كوكس حيميا ءوندىرىسىن 100 پايىز، سونداي- اق حالىقتى جانە كوممۋنالدىق سەكتوردى وتىنمەن تولىق قامتاماسىز ەتەدى. سالادا شامامەن 30 مىڭ ادام جۇمىس ىستەيدى. تاۋەلسىزدىك جىلدارىنىڭ ىشىندە كومىر ءوندىرۋشى كاسىپورىندار 2,7 ميلليارد توننا كومىر ءوندىرىپ، شامامەن 0,8 ميلليارد توننا كومىر تاياۋ جانە الىس شەت ەلدەرگە ەكسپورتقا شىعاردى»، - دەدى كوميتەت ءتوراعاسىنىڭ ورىنباسارى.
اۆتور: مارلان جيەمباي
