قازاق-قىرعىز اراسىنداعى تاۋار اينالىمى 1 ميلليارد دوللارعا جەتتى - پرەمەر
قازاقستان ۇكىمەتى رەسمي سايتىنىڭ مالىمەتىنشە، شاعىن جانە كەڭەيتىلگەن قۇرامداعى ۇكىمەتارالىق كەلىسسوزدەردە تاراپتار ساۋدا-ەكونوميكالىق، سۋ-ەنەرگەتيكالىق، كولىك-لوگيستيكالىق، ونەركاسىپتىك جانە ينۆەستيتسيالىق سالالارداعى ەكىجاقتى ىنتىماقتاستىقتىڭ وزەكتى ماسەلەلەرىن تالقىلاعان.
قىرعىز تاراپىنا جىلى شىرايمەن قابىلداعانى ءۇشىن العىس بىلدىرە وتىرىپ، ءاليحان سمايىلوۆ قىرعىزستان قازاقستاننىڭ نەگىزگى ساۋدا-ەكونوميكالىق سەرىكتەستەرىنىڭ ءبىرى عانا ەمەس، سونىمەن قاتار ءداستۇرلى دوستىق قارىم-قاتىناستار بايلانىستىراتىن باۋىرلاس مەملەكەت ەكەنىن اتاپ ءوتتى.
قازاقستان ۇكىمەتىنىڭ باسشىسى ەكى ەل اراسىنداعى تاۋار اينالىمىن ارتتىرۋ ماسەلەسىنە ەرەكشە توقتالدى، ول قازىردىڭ وزىندە 1 ميلليارد دوللارعا جەتىپ وتىر.
«البەتتە، ءبىز مۇنىمەن شەكتەلىپ قالمايمىز، ەكى ەلدىڭ الەۋەتى بۇدان دا جوعارى دەپ ەسەپتەيمىن. ءبىزدىڭ الدىمىزدا تۇرعان ەندىگى مىندەت - ءوزارا ساۋدا دەڭگەيىن 2 ميلليارد دوللارعا دەيىن جەتكىزۋ»، - دەدى ءاليحان سمايىلوۆ.
ق ر پرەمەر-ءمينيسترىنىڭ ويىنشا، قويىلعان ماقساتقا قول جەتكىزۋ ءۇشىن تاۋار نومەنكلاتۋراسىن كەڭەيتۋ، يندۋستريالىق ساۋدا-لوگيستيكالىق كەشەندەردى قۇرۋ جونىندەگى جۇمىستى جانداندىرۋ، سونداي-اق كولەڭكەلى تاۋار اينالىمىنا قارسى كۇرەس شارالارىن كۇشەيتۋ قاجەت.
ءوز كەزەگىندە قىرعىز مينيسترلەر كابينەتىنىڭ باسشىسى اقىلبەك جاپاروۆ ەكى حالىق اراسىنداعى تاريح پەن مادەنيەتتىڭ ورتاقتىعىنا، ءوزارا تۇسىنىستىك پەن سەنىمگە نەگىزدەلگەن دوستىق جانە باۋىرلاستىق بايلانىستار ورتاق ماقسات - حالىقتارىمىزدىڭ گۇلدەنۋى مەن ءال-اۋقاتىن ارتتىرۋعا كومەكتەسەتىنىنە سەنىم ءبىلدىردى.
كەزدەسۋ سوڭىندا تاراپتار كەلىسسوزدەردىڭ جەمىستى بولعانىن اتاپ ءوتىپ، تاتۋ كورشىلىك جانە ستراتەگيالىق سەرىكتەستىك رۋحىندا مەملەكەتارالىق بەلسەندى ءىس-قيمىلدى جالعاستىرۋعا دايىن ەكەندەرىن ءبىلدىردى.
كەلىسسوزدەر قورىتىندىسى بويىنشا ۇكىمەتارالىق كەڭەستىڭ 10-وتىرىسىنىڭ حاتتاماسىنا، سونداي-اق «GFC Bishkek» ج ش ق قۇرۋ تۋرالى كەلىسىمگە قول قويىلدى.
كەلىسىم ا ح ق و جاسىل قارجى ورتالىعىنىڭ جانە قىرعىزستاندىق سەرىكتەستەر - «ايىل بانك» ا ا ق، «قىرعىز قور بيرجاسى» جاق جانە «قىرعىزستان بانكتەرىنىڭ وداعى» ز ت ب قاتىسۋىمەن بىرلەسكەن كومپانيا قۇرۋدى كوزدەيدى.
بىرلەسكەن كومپانيانى قۇرۋ استانا حالىقارالىق قارجى ورتالىعىن قىرعىزستاندا جانە ورتالىق ازيا وڭىرىندە ىلگەرىلەتۋگە باعىتتالعان.
