قاڭتار قىرعىنىنا قاتىسى بار دەگەن كۇدىكپەن 1 مىڭنان استام ادام تەرگەلىپ جاتىر - ءى ءى م
بۇل تۋرالى ق ر ءى ءى م تەرگەۋ دەپارتامەنتىنىڭ باسقارما باسشىسى ەرمەك شۇلدەن ءمالىم ەتتى، دەپ حابارلايدى قازاقپارات ءتىلشىسى.
«قازىر قاڭتار وقيعاسىنا قاتىستى ءار ءىس جان-جاقتى قارالىپ جاتىر. جاپپاي تارتىپسىزدىكتىڭ سەبەبى مەن سالدارى انىقتالۋدا. بۇگىندە 2919 قىلمىستىق ءىس قوزعالعان. ونىڭ دەنى - ۇرلىق پەن توناۋ. جاپپاي تارتىپسىزدىكتى پايدالانىپ قاراپايىم حالىقتىڭ مۇلكىن تالان-تاراجعا سالىپ، توناعان. سونىمەن قاتار زاڭسىز قارۋ-جاراق يەلەنۋ دە بار. قازىرگى تاڭدا وسى قىلمىستىق ىستەر بويىنشا 1 مىڭنان استام ادام جاۋاپكەرشىلىككە تارتىلىپ جاتىر. ونىڭ 400 ءى كۇزەتپەن ۇستالدى، ونىڭ ىشىندە 219 ادامعا باس بۇلتارتپاۋ شاراسىن قولداندىق»، - دەدى ەرمەك شۇلدەن «Qazaqstan» ۇلتتىق تەلەارناسىنىڭ «Ashyq alań « قوعامدىق-ساياسي توك-شوۋىنىڭ ەفيرىندە.
ءى ءى م وكىلىنىڭ ايتۋىنشا، ۇستالعان كۇدىكتىلەردىڭ ىشىندە جاس وسپىرىمدەر دە بار.
«قاڭتار وقيعاسى كولەمدى، قارالاتىن ءىس كوپ. ءار وقيعانى تياناقتى، وبەكتيۆتى تۇردە قاراۋ كەرەك. جاپپاي تارتىپسىزدىك كەزىندە 1700 دەن استام نىسان زاقىمداندى. ىشكى ىستەر ورگاندارى ۇرلىق، كىسى ءولتىرۋ، توناۋ جانە باسقا قىلمىس ءتۇرى بويىنشا تەرگەۋ جالعاسىپ جاتىر»، - دەيدى ول.