ەلورداداعى ۇلكەن جانە كىشى تالدىكولدە ەكوپارك قۇرۋعا 1 ميلليارد تەڭگە ءبولىندى
نۇر- سۇلتان. قازاقپارات - نۇر- سۇلتان قالاسىنداعى ۇلكەن جانە كىشى تالدىكولدە ەكوپارك اشىلادى. بۇل ماقساتقا 1 ميلليارد تەڭگە قارجى ءبولىنىپ وتىر، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.
كىشى تالدىكولدەگى ەكوپارك جوباسى (ە-10 كوشەسى، «جاسىل جەلەك» تۇرعىن ءۇي كەشەنىنە قاراما- قارسى) سۋ قويماسىن اباتتاندىرۋدى قاراستىرادى: سۋ قويماسىن اينالدىرا تاستان جاسالعان جاعالاۋ بولادى. بۇل سۋدىڭ تابيعي ءسۇزىلۋىن جانە قاجەتتى ەكوجۇيەنى قۇرۋعا مۇمكىندىك بەرمەك.
سونداي- اق سۋ دەڭگەيىن ساقتاپ ءارى وتتەگىمەن بىركەلكى قانىقتىرۋ ءۇشىن بيودرەناجدىق جۇيەنى ۇيىمداستىرۋ جانە سۋ ايدىنىن اەراتسيالاۋ كوزدەلۋدە. سونىمەن قاتار، سەرۋەندەۋ ءۇشىن ارنايى ينفراقۇرىلىم جاسالادى: جاعالاۋداعى سۋلى- باتپاقتى جەرلەردە تەرراسسالىق جاعالاۋ ساقتالادى جانە فلورا مەن فاۋناسى بار ەكوكليمات ءۇشىن جاعداي جاسالادى.
«تالدىكولدىڭ وزىندە (ۇلكەن تالدىكول) ءوزىنىڭ ەكولوگيالىق ينفراقۇرىلىمى بولادى. ۇلكەن تالدىكول كولىنىڭ جانىندا قورىق جانە ورمان- ساياباق ايماعى بار ەلىمىزدەگى العاشقى تابيعي پارك اشىلادى. ۋربانيستيكا ورتالىعى بازاسىندا، سونداي- اق ەسىل اۋدانىنىڭ اكىمدىگىندە ساۋلەت، قالا قۇرىلىسى جانە جەر قاتىناستارى باسقارماسىنىڭ، سول سياقتى قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىلارى كىشى تالدىكولدىڭ ماسەلەسى بويىنشا ەكوبەلسەندىلەرمەن، ەكولوگتارمەن جانە بەلسەندى تۇرعىندارمەن بىرنەشە رەت كەزدەسۋ وتكىزدى»، - دەلىنگەن قالا اكىمدىگى سايتىندا.
