سەۋلدە پاتەردىڭ ورتاشا باعاسى 1 ميلليون دوللاردان استى
قازىر تاڭعى سامال ەلى وسى كورسەتكىشى بويىنشا گونكونگ پەن سينگاپۋردان كەيىن ءۇشىنشى تۇر. وڭتۇستىك كورەيا ۇكىمەتى دە شاراسىز. باعانى تومەندەتۋگە تىرىسقانمەن، ەش ناتيجە جوق. سەۋلدە 83 شارشى مەتر پاتەردىڭ ورتاشا باعاسى بيىل 1 ميلليون دوللاردان استى.
كۋنمين بانكتىڭ مالىمەتى بويىنشا، سەۋل تۇرعىنى ءۇي الۋ ءۇشىن 17 جىل بويى جالاقىسىنىڭ ءبىر تيىنىن جۇمساماي پاتەرگە اقشا جيناۋ كەرەك. مىڭداعان سەۋل تۇرعىندارى پاتەر جالداۋعا ءماجبۇر. چونسە جۇيەسى بويىنشا جالعا الۋشى يەسىنە مۇلىك قۇنىنىڭ 50 - دەن 70 پروتسەنتىنە دەيىن كەپىل رەتىندە بەرەدى. قوجايىن بۇل اقشانى بانككە دەپوزيتقا سالىپ، پروتسەنتىن الادى. جالعا الۋشى پاتەردە تەگىن تۇرادى جانە ەكى جىلدان كەيىن پاتەر يەسى وعان كەپىلدى تولىق قايتارادى.
ەلۋ ءۇش جاستاعى كيمن سون وسىنداي شارتپەن پاتەر جالداپ تۇرادى. ول مەملەكەتتىك قىزمەتشى، سوندىقتان كەپىلدىڭ 70 پروتسەنتىن مەملەكەتتەن الادى.
كيم ەن سون، سەۋل تۇرعىنى:
- جاستار قالاي ءومىر سۇرەدى؟ ولاردىڭ جالاقىلارىمەن ميلليون دوللار تۇراتىن پاتەرگە اقشا جيناۋ مۇمكىن ەمەس. ۇكىمەت جاستارعا باسپانا الۋعا مۇمكىندىك بەرەتىن ساياساتتى دايىنداۋ كەرەك. ويتكەنى، باسپاناسىز بالالاردى اسىراۋ قيىن. ال بالا تۋۋدىڭ تومەندەۋى - كۇردەلى ماسەلە.
سەۋلدە باسپانا قولجەتىمسىز. سوندىقتان جاستاردىڭ كوبى ونىمەن جاپسارلاس كنگي پروۆينتسياسىنان پاتەر ساتىپ الادى. جەرلەسىمىز دينارا قوشقاربايەۆا وتباسىمەن بىرگە كورەي استاناسىنىڭ شەتىندە ون جىل پاتەر جالدادى. ءبىر اي بۇرىن سەۋلدەن 50 شاقىرىم جەردەگى ياندجۋ قالاسىنان ءۇي ساتىپ الدى. كولەمى شامامەن ءجۇز شارشى مەتر ءۇيدىڭ باعاسى شامامەن 250 مىڭ دوللار. دينارا مەن ونىڭ جۇبايىنىڭ تابىسى يپوتەكاعا جەتپەگەندىكتەن، نەسيە مەملەكەتتىك قىزمەتتە جۇمىس ىستەيتىن تۋىسىنا بەرىلدى. قارىزدى 20 جىل ىشىندە وتەۋ كەرەك.
دينارا قوشقاربايەۆا، سەۋل تۇرعىنى:
- يپوتەكاعا مىڭ دوللار شاماسىندا جەتەدى. سودان كەيىن تاماعى بار، باسقاسى بار - تاعى مىڭ دوللار. سوسىن بالالاردىڭ وقۋى، ۇيىرمەلەرى بار - 400-500. سوسىن كوممۋنالدىق قىزمەتكە تاعى 500-600 مىڭ دوللار كەتەدى.
مامانداردىڭ ايتۋىنشا، جىلجىمايتىن مۇلىك داعدارىسى - الىپساتارلىقتىڭ ناتيجەسى. سالىقتى ءوسىرۋ دە باعانى تومەندەتە المادى. بيىل ۇلتتىق تۇرعىن ءۇي قاۋىمداستىعى قىزمەتكەرلەرى اراسىندا سىبايلاس جەمقورلىق فاكتىلەرى انىقتالعان. ولار جاڭا ۇيلەر سالىناتىنىن ءبىلىپ، سول جەردە ۋچاسكەلەردى الدىن الا ساتىپ الادى ەكەن. ەندى ۇكىمەت باسپانا ماسەلەسىن شەشۋدىڭ وزگە وڭتايلى جولدارىن قاراستىرىپ الەك.
لي مەن چول، كونسالتينگ كومپانياسىنىڭ مەنەدجەرى:
- ەندى جىلجىمايتىن مۇلىك باعاسىن تومەندەتۋ ءۇشىن ۇكىمەت زاڭناماعا جىلجىمايتىن مۇلىككە نەسيە بەرۋ بويىنشا تۇزەتۋلەر ەنگىزۋدە. پروتسەنت پەن نەسيەلەۋ تۇزەلگەندە، بۇل جىلجىمايتىن مۇلىك نارىعىنا جاقسى اسەر ەتەدى. مۇنداي باعدارلاما قاراشا ايىندا باستالادى.
باسپانا ماسەلەسىن شەشۋ - پرەزيدەنت مۋن چجە يننىڭ ۋادەلەرىنىڭ ءبىرى. ءبىراق، ونى ورىنداۋى قيىن. جاڭا مەملەكەت باسشىسىنىڭ سايلانۋىنا التى اي عانا قالدى.
www.24.kz
