الەمدىك تۋريزم سالاسى 1 تريلليون دوللاردان اسا كىرىسىنەن ايىرىلعان

نۇر- سۇلتان. قازاقپارات - فرانسيادا پاندەميا باستالعالى العاش رەت تۋريزمگە ارنالعان كورمە اشىلدى، دەپ حابارلايدى «حابار 24».

ىندەتتەن قاتتى زارداپ شەككەن سالانىڭ ەندى وڭالا باستاعانىن بىلدىرگەندەي. سەبەبى بىلتىر الەمدىك تۋريزم سالاسى 1 تريلليون دوللاردان اسا كىرىسىنەن ايىرىلىپ، اۋىر كەزەڭدى باستان كەشكەن.

كوروناۆيرۋس ىندەتى فرانسيانىڭ دا تۋريزم يندۋسترياسىن تۇرالاتىپ تاستادى. پاندەمياعا دەيىن ەلدىڭ ىشكى جالپى ءونىمىنىڭ 7 پروتسەنتىن قۇراپ كەلگەن سالا ۇلكەن شىعىنعا باتتى. قازىرگە دەيىن كوپتەگەن مەملەكەتتىڭ تۋريستەرى ءۇشىن شەكارا ءالى جابىق. سوندىقتان بولسا كەرەك سوڭعى 2 جىلدا العاش رەت وتكىزىلىپ وتىرعان كورمەدە ويىن- ساۋىق پەن اسەم بەزەندىرۋلەر از.

جان- باتيست لەمۋان، فرانسيا سىرتقى ىستەر مينيسترلىگى جانىنداعى تۋريزم جونىندەگى مەملەكەتتىك حاتشى:

- ءبىزدىڭ ەلدەردەگى ىندەتكە قارسى شارالار ۆيرۋسقا توسقاۋىل قويىپ، بۇرىنعى بايلانىسىمىز تەزدەتىپ قالپىنا كەلەدى دەپ ۇمىتتەنەمىن. قازاقستان مەن فرانسيانىڭ ستراتەگيالىق سەرىكتەستىگى مىعىم. ءبىراق شەتەلدىك تۋريستەردى قابىلداۋدىڭ قاشان تولىق قالپىنا كەلەتىنى جايلى ايتۋ قيىن. ماسەلە كوپ ۇزاماي شەشىلەدى دەپ ويلايمىن.

ال فرانسياعا ساياحاتتاعىسى كەلەتىن وتانداستارىمىزعا ءبىراز توزىمدىلىك تانىتۋعا تۋرا كەلەدى. بۇل ەلگە ۆاكسيناسىز كىرۋگە بولاتىن مەملەكەتتەر ءتىزىمى ءار 2 اپتا سايىن قاراستىرىلادى. فرانسۋزدار بولسا ءبىزدىڭ ەلگە وزگە ەۋروپالىقتار سياقتى ەش كەدەرگىسىز ساياحاتتاي الادى. قازىر ەلدە ازياعا بارعىسى كەلەتىندەردىڭ قاراسى كوبەيگەن.

ميشەل تيسسە

- ءبىز ازياعا ساياحاتتاعىسى كەلەتىن ازاماتتاردان ءبىراز شىدامدىلىق تانىتۋدى سۇرايمىز. قازىر ءبىرقاتار مەملەكەت شەكاراسىن اشىپ، شەتەلدىكتەردى قابىلداي باستادى. يوردانيا، يزرايل، ورتالىق ازيا مەن موڭعولياعا تۋريستەر ەش كەدەرگىسىز بارا الادى. بۇل باعىتتاردىڭ بارىنە كەپىلدىك بەرەمىز. ءبىراق ازياداعى ءىرى باعىتتاردىڭ اشىلۋىن ءالى كۇتە تۇرۋعا تۋرا كەلەدى.

سوڭعى ونجىلدىقتا الەمدە تۋريزم قارقىندى دامىپ، شەتەلگە ساياحات شەگۋشىلەر ارتقان ەدى. ءبىراق بىلتىر ىندەتتەن جاھاندىق تۋريزم كىرىسى 74 پروتسەنتكە تومەندەدى. ساراپشىلار سالانىڭ قالپىنا كەلۋى ۇزاققا سوزىلاتىنىن ايتادى. دۇنييەجۇزىلىك تۋريزم ۇيىمىنىڭ مالىمەتىنشە، بۇل سالا الدىمەن تاياۋ شىعىس پەن افريكادا جاندانىپ، امەريكا، ەۋروپا جانە ازيا باعىتتارى تەك 2024 -جىلى قالپىنا كەلۋى مۇمكىن.