استانالىقتاردىڭ سۋعا قارىزى 1 ميلليارد تەڭگەدەن استى
بۇل تۋرالى «استانا سۋ ارناسى» مەكەمەسى ەكونوميكالىق جوسپارلاۋ ءبولىمىنىڭ باس مامانى ۆيتالي ارتامونوۆ ءمالىم ەتتى، دەپ حابارلايدى قازاقپارات ءتىلشىسى.
«بيىل 8 ايدىڭ قورىتىندىسى بويىنشا تۇتىنۋشىلاردىڭ سۋعا قارىزى 1 ميلليارد 120 ميلليون تەڭگەنى قۇراپ وتىر. اتالعان سومانىڭ 159 ميلليون تەڭگەسى جەكە تۇلعالاردىڭ قارىزى. قالعان بەرەشەك سوماسى زاڭدى تۇلعالارعا تيەسىلى. ەرەكشە توقتالىپ وتەتىن جايت، ەلوردادا زاڭدى تۇلعالار 963 ميلليون تەڭگە سۋعا قارىز. سول سومانىڭ 559 ميلليون تەڭگەسى نەشە جىل بۇرىن جابىلىپ قالعان نەمەسە بانكروتقا ۇشىراعان مەكەمەلەرگە تيەسىلى. ياعني بەرەشەك ۇيىمدار قىزمەتىن الدەقايدا توقتاتقان. جوق دەسەك تە بولادى. وسى ورايدا ءبىز قالالىق اكىمدىككە قىزمەتى توقتاعان مەكەمەلەردىڭ سۋعا بەرەشەگىن جويۋ كەرەكتىگىن، ياعني ەسەپتەن شىعارۋدى ۇسىندىق»، - دەدى ۆيتالي ارتامونوۆ ب ا ق وكىلدەرىنە ارنالعان باسپا ءسوز تۋرى بارىسىندا.
ونىڭ ايتۋىنشا، قىزمەتى توقتاعان مەكەمەلەردىڭ سۋعا بەرەشەگى ماسەلەسى بۇگىندە قالالىق اكىمدىك دەڭگەيىندە قارالىپ جاتىر. سونداي-اق، اتالعان مەكەمە وكىلى ەلوردادا جىلىنا 82 ميلليون تەكشە مەتر سۋ قولدانىلاتىنىن ايتتى.
بۇعان دەيىن حابارلاعانىمىزداي، بۇگىندە نۇر-سۇلتان قالاسىندا 2,4 شاقىرىمدى قۇرايتىن سۋ قۇبىرى جوندەلىپ جاتىر.
