قازاقستاندا ونلاين ساناقتان وتكەندەردىڭ سانى 1 ميلليوننان استى
بۇل تۋرالى ق ر ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىن ساناقتان ونلاين وتكەن ازاماتتاردىڭ سانى 1 ميلليون ادامنان استى. قازىرگى ۋاقىتتا ساناق كورسەتكىشى بويىنشا 2 مەگاپوليس - الماتى مەن نۇر- سۇلتان قالاسى الدا كەلەدى. ال س ق و جانە اتىراۋ وبلىستارى ساناقتا سوڭعى ورىندا تۇر. ساناقتان ءوتۋ بارىسىندا تۇرعىندار تاراپىنان سۇراقتار تۋىنداپ جاتىر، ولارعا قاتىستى ءبىزدىڭ الەۋمەتتىك جەلىلەردە، ب ا ق ارقىلى جانە sanaq.gov.kz سايتى ارقىلى ءتۇسىندىرۋ جۇمىسى ۇدايى جۇرگىزىلۋدە. سونداي- اق، 1446 ءنومىرلى Call ورتالىعى جۇمىس ىستەيدى، وعان تاۋلىك بويى حابارلاسۋعا بولادى جانە قوڭىراۋ سوعۋ تەگىن»، - دەدى نۇربولات ايداپكەلوۆ.
ونىڭ ايتۋىنشا، ساناقتان ءوتۋ ءۇشىن بىرنەشە پلاتفورما قاراستىرىلعان.
«ازاماتتار sanaq.gov.kz سايتى، E- Gov پورتالىندا تىركەلۋ جانە Aitu موبيلدى قوسىمشاسى ارقىلى ساناقتان وتە الادى. سونىمەن قاتار ىڭعايلى بولۋ ءۇشىن اۋماقتىق ستاتيستيكا دەپارتامەنتتەرىندە، حالىققا قىزمەت كورسەتۋ ورتالىقتارىندا، قازپوشتا فيليالدارى جانە ءىرى ساۋدا ورتالىقتارىندا ساناق بۇرىشى ورنالاستىرىلعان. ول جەردە ساناقتان ونلاين رەجىمدە وتۋگە قاتىستى كومەك، كەڭەس بەرىلەدى»، - دەيدى ول.
وسى ورايدا ۇلتتىق ستاتيستيكا بيۋروسى ازاماتتاردى ونلاين ساناققا بەلسەندى تۇردە قاتىسۋعا شاقىرادى. جانە sanaq.gov.kz سايتىنىڭ 15 - قازانعا دەيىن تاۋلىك بويى قولجەتىمدى بولاتىنىن ەسكە سالادى.
اۆتور: ءالي يبرايەۆ