اۋىل اكىمىن سايلاۋ: ءوزىن ءوزى ۇسىنعان كانديدات تۇرعىنداردىڭ كەم دەگەندە 1 پايىز قولىن جيناۋ قاجەت
«سەنات اۋىل اكىمدەرىن سايلاۋ تۋرالى زاڭ قابىلدادى. بۇدان بىلاي اۋداندىق ماڭىزى بار قالالاردىڭ، اۋىلداردىڭ، كەنتتەردىڭ جانە اۋىلدىق وكرۋگتەردىڭ اكىمدەرى تىكەلەي سايلاۋدا سايلاناتىن بولادى. سايلاۋعا جاسى 25 كە تولعان ازاماتتار قاتىسا الادى. كانديداتتاردى ساياسي پارتيالار مەن اۋدان اكىمدەرى ۇسىنادى. سونداي- اق، ازاماتتار ءوزىن ءوزى ۇسىنىپ، سايلاۋعا كانديدات رەتىندە قاتىسۋعا مۇمكىندىگى بار. ول ءۇشىن سول اۋىل تۇرعىندارىنىڭ كەم دەگەندە 1 پايىزىنىڭ قولىن جيناۋ قاجەت. بىلتىر « ۇلتتىق كەڭەس « -تىڭ ساياسي رەفورمالار جونىندەگى توبى وسى تاقىرىپقا قاتىستى بىرنەشە ۇسىنىس ايتتى. سونىڭ ءبىرى - اۋىل اكىمدەرىن تىكەلەي جاسىرىن داۋىس بەرۋ ارقىلى سايلاۋ جانە كەز كەلگەن ازاماتتىڭ سايلانۋ قۇقىعىن شەكتەمەۋ. سول جولى اۋىل اكىمىنە ۇمىتكەرلەرگە قويىلاتىن تالاپ تا جەڭىلدەۋ بولسىن دەگەن تىلەگىمىزدى ايتقان ەدىك»، - دەپ جازدى ماكسيم سپوتكاي جەلىدەگى پاراقشاسىندا.
ونىڭ حابارلاۋىنشا سەناتتا قابىلدانعان زاڭنىڭ ماڭىزى وتە زور.
«پرەزيدەنتىمىز ايتقانداي، اۋىل اكىمدەرىن سايلاۋدى جۇزەگە اسىرامىز دەپ اسىعىستىق، ناۋقانشىلدىق تانىتپاۋ كەرەك. قازاقستاننىڭ ساياسي ترانفورماتسياسى ءبىر ساتتىك، پوپۋليستىك اكسيا ەمەس. بۇل رەفورما ماعىناسى جاعىنان ستراتەگيالىق سيپاتقا يە. سونىمەن قاتار بۇگىن سەناتورلار مەملەكەت باسشىسىنىڭ باستاماسىمەن قولعا الىنعان ساياسي رەفورمالاردى ىسكە اسىرۋ اياسىندا سايلاۋ تۋرالى زاڭنامالارعا ءبىرقاتار تۇزەتۋلەر ەنگىزدى. ونىڭ ىشىندە - ساياسي پارتيالاردىڭ ءماجىلىس پەن ءماسليحاتتارعا ءوتۋ شەگىن 7 دەن 5 پايىزعا دەيىن تومەندەتۋ جانە داۋىس بەرۋ بيۋللەتەندەرىنە «بارىنە قارسىمىن» دەگەن باعان ەنگىزۋ. بۇل زاڭدار پرەزيدەنتىمىز باستاعان ساياسي رەفورمالاردى ىسكە اسىرۋ جولىنداعى كەلەسى نىق قادام دەپ ايتۋعا بولادى. ال بۇل رەفورمالاردىڭ تۇپكى ماقساتى - ەلدى دەموكراتيزاتسيالاۋ پروتسەسىن جالعاستىرۋ جانە بارلىق قازاقستاندىقتاردىڭ ءال- اۋقاتىن ارتتىرۋ دەپ قابىلداعان ءجون»، - دەپ تولىقتىردى ول.
ايتا كەتسەك، بۇعان دەيىن سەنات اكىمدەردى تىكەلەي حالىقتىڭ سايلاۋىنا مۇمكىندىك بەرەتىن زاڭدى قابىلداعانى تۋرالى جازدىق.
