ناۋرىزدا العاش رەت مەكتەپ تابالدىرىعىن اتتاعان 1-سىنىپ وقۋشىلارىنىڭ ۆيدەوسى جاريالاندى

نۇر-سۇلتان. قازاقپارات - الماتىدا بيىلعى وقۋ جىلىندا العاش رەت ءبىرىنشى سىنىپ وقۋشىلارى مەكتەپكە باردى.

قالاداعى گيمنازيالاردىڭ بىرىندە مەكتەپ تۇلەكتەرى وقۋشىلاردى ەرەكشە كۇتىپ العان ءساتتىڭ ۆيدەوسى الەۋمەتتىك جەلىلەردە تارادى.

الماتىداعى №105 گيمنازيانىڭ Instagram-پاراقشاسىندا مەكتەپ ءبىتىرۋشى تۇلەكتەر ءبىرىنشى سىنىپ وقۋشىلارىن قارسى العانى تۇسىرىلگەن جانتەبىرەنتەر ۆيدەو پايدا بولدى. جوعارى سىنىپ وقۋشىلارى كىرەبەرىسكە جينالىپ، مەكتەپكە العاش رەت كىرگەن بالالاردى قول شاپالاقتاپ قارسى الدى.

№ 105 گيمنازيا ديرەكتورى ءاليا ساندىقبايەۆا بۇل ءراسىم مەكتەپتىڭ ءداستۇرلى شاراسى ەكەنىن ايتتى.

«1-قىركۇيەكتەن باستاپ ءبىرىنشى سىنىپ وقۋشىلارى مەكتەپتى دە، مۇعالىمدى دە، سىنىپتاستارىن دا كورمەدى. ءبىز ولاردى سالتاناتتى تۇردە قارسى الدىق. كارانتين شارالارى جەڭىلدەگەندىكتەن، اۋداندا ءبىرىنشى بولىپ وسىنداي كەزدەسۋ ۇيىمداستىردىق. بۇگىن مەكتەپ ءىشى جانداندى. بۇل بارىمىزگە ۇلكەن مەرەكە بولدى. ويتكەنى بالالار ءۇشىن جاڭا كەزەڭ باستالدى»، - دەپ ءبولىستى ءاليا ساندىقبايەۆا.

ديرەكتوردىڭ ايتۋىنشا، مەكتەپتە ماسكا رەجيمى قاتاڭ ساقتالادى. جالپى گيمنازيا ارالاس وقىتۋ فورماتىندا جۇمىس ىستەيدى، ياعني كەيبىر پاندەر ءالى دە ونلاين وتەدى.

بۇعان دەيىن ەپيدەميولوگيالىق جاعدايدىڭ جاقسارۋىنا بايلانىستى قازاقستاندىق مەكتەپتەردە وقىتۋدىڭ ارالاس وقىتۋ فورماتى ەنگىزىلگەنى حابارلانعان ەدى. بۇل تۋرالى ءبىلىم جانە عىلىم ۆيتسە- ءمينيسترى شولپان كارينوۆا مالىمدەدى.