مەكتەپ وقۋلىقتارى كەمىندە 1 جىل بۇرىن بەيىمدەۋدەن وتكىزىلەدى - ءبىلىم جانە عىلىم ءمينيسترى

بۇل تۋرالى ماجىلىستەگى «Nur Otan» پارتياسى پارلامەنتتىك فراكسياسىنىڭ كەڭەيتىلگەن وتىرىسىندا ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«وقۋلىق وتە ماڭىزدى قۇرال جانە ولاردىڭ ساپاسىن كوتەرۋ ءۇشىن كەشەندى ءىس- شارالار ىسكە اسىرىلىپ جاتىر. بىرىنشىدەن، 2021 -جىلعى 1-قاڭتاردان باستاپ دەپۋتاتتاردىڭ قولداۋىمەن جاڭا 2 نورما ىسكە اسىرا باستادى. ەندى ءبىلىم بەرۋ باعدارلامالارى مىندەتتى تۇردە الدىن الا ساراپتامادان، ودان كەيىن بەيىمدەۋدەن وتەدى. بۇل دا وقۋلىقتاردىڭ ساپاسىن ارتتىرۋعا سەپتىگىن تيگىزەرى ءسوزسىز. ەكىنشىدەن، مينيسترلىك وسى وقۋلىقتاردى دايىنداۋدىڭ جاڭا جۇيەسىن دايىنداپ، بەكىتتى. ۇشىنشىدەن، ساراپتاما، ياعني ساراپتاۋ جۇيەسى تۇبەگەيلى وزگەرەدى. ەندى ساراپتامادان وتكىزەتىن ءبىزدىڭ ساراپشىلارىمىز مىندەتتى تۇردە سەرتيفيكاتتاۋدان وتەتىن بولادى»، - دەدى مينيستر «Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» سايلاۋ باعدارلاماسىن ورىنداۋدىڭ جول كارتاسىن تالقىلاۋ بارىسىندا.

ونىڭ اتاپ وتۋىنشە، بۇعان دەيىن ساراپتاما جاساۋ ءۇشىن مۇعالىمدەر شاقىرتىلىپ وتىرعان. ال ونشاقتى وقۋلىقتى قىسقا عانا ۋاقىتتىڭ ىشىندە ساراپتاپ شىعۋ وتە قيىن. ەندى ولار وقىتۋدان، سەرتيفيكاتتاۋدان وتكەننەن كەيىن وقۋلىقتار دايىندايتىن بولادى.

سونىمەن قاتار اۆتورلاردى دا وقىتىپ، سەرتيفيكاتتاۋدان وتكىزۋ ءراسىمى بەكىتىلىپ جاتىر. بۇل رەتتە ماڭىزدى ماسەلەلەردىڭ ءبىرى - وقۋلىقتاردى بەيىمدەۋ. ەندى 1-سىنىپتان 11-سىنىپقا دەيىنگى بارلىق وقۋلىقتار كەمىندە 1 جىل بويى ىلكى مەكتەپتەردە الدىن الا بەيىمدەۋدەن وتكىزىلەدى. وسى جانە باسقا دا شەشىمدەر وقۋلىقتاردىڭ ساپاسىن تۇبەگەيلى كوتەرەدى دەپ سەنەمىز»، - دەدى اسحات ايماعامبەتوۆ.

اۆتور: مارلان جيەمباي