قازاقپارات كۇنتىزبەسى: 1- اقپان
اتاۋلى كۇندەر
بۇكىل الەمدىك ۇيلەسىمدى كونفەسسياارالىق قاتىناستار اپتالىعى
بۇكىل الەمدىك ۇيلەسىمدى كونفەسسياارالىق قاتىناستار اپتالىعىن حالىقارالىق قوعامداستىق العاش رەت 2011-جىلعى 1-7- اقپان ارالىعىندا تويلاندى. بىرىككەن ۇلتتار ۇيىمى بارلىق مەملەكەتتەردى وسى اپتا بارىسىندا ەرىكتى تۇردە كونفەسسياارالىق ۇيلەسىم مەن قايىرىمدىلىق تانىتۋعا شاقىرادى.
شىركەۋلەر، مەشىتتەر، سيناگوگالار، تاعى باسقا دا عيبادات ۇيلەرى وقيعالار ورتالىعىنا اينالۋى ءتيىس.
ەستە قالار وقيعالار
1964-جىلى ك س ر و مينيسترلەر كەڭەسىنىڭ «قازاق ك س ر- ىندەگى قوي شارۋاشىلىعىن دامىتۋ ءۇشىن ءشول جانە شولەيت جايىلىمداردى يگەرۋ تۋرالى» قاۋلىسى جاريالاندى.
1992-جىلى ەۋروپالىق قاۋىپسىزدىك جانە ىنتىماقتاستىق كەڭەسىنىڭ پراگادا وتكەن سەسسياسىندا تۇڭعىش رەت قازاقستاننىڭ بايراعى ورناتىلدى.
2005-جىلى يزرايلدە قازاق كينوسىنىڭ كۇندەرى ءوتتى. قازاق كينوسىن تانىستىرۋ ءۇشىن يزرايلگە «قازاق فيلم» وكىلدەرى جانە باس ديرەكتورى سەرگەي ءازىموۆ باستاعان تانىمال قازاقستاندىق رەجيسسەرلاردان تۇراتىن دەلەگاتسيا باردى. تەل-اۆيۆ، حايفا جانە يەرۋساليم قالالارىندا قازاق كينوسى كۇندەرىنىڭ سالتاناتتى اشىلۋى ءوتتى.
رەجيسسەر ساتىبالدى نارىمبەتوۆ سەمەي يادرولىق پوليگونى ماڭىندا تۇرعان ادامداردىڭ تاعدىرى تۋرالى باياندايتىن «قىزجىلاعان» فيلمىن تانىستىردى. قازاقستاندىق كينوتۇسىرۋشىلەر يزرايلگە ءتۇرلى جانرداعى التى فيلم اپاردى.
2010-جىلى ىلە الاتاۋى جانە جوڭعار الاتاۋى مەملەكەتتىك ۇلتتىق تابيعي پاركتەر اۋماعىندا جابايى المانىڭ ەڭ باعالى سىلەمدەرىنە ەرەكشە رەجيمدەگى ورماندى گەنەتيكالىق رەزەرۆاتتار دارەجەسى بەرىلدى.
2012 -جىلى «قازاق ەنتسيكلوپەدياسى» باسپاسى «قانىش ساتبايەۆ» ەنتسيكلوپەدياسىن شىعاردى. وندا قانىش يمانتاي ۇلىنىڭ بالالىق شاعىنان باستاپ، ەسەيۋ جانە تۇلعا رەتىندە قالىپتاسۋ جولدارى مەن قورشاعان ورتاسى تۇگەل قامتىلعان. سونداي-اق قوعام جانە مەملەكەت قايراتكەرىنىڭ ەڭبەكتەرى جيناقتالىپ، ول تۋرالى عىلىمي پايىمداۋلار بەرىلدى.
2012 -جىلى استانادا حالىق جازۋشىسى ساكەن ءجۇنىسوۆ تۇرعان ۇيگە ەسكەرتكىش تاقتا ورناتىلدى.
2013 -جىلى س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ ەكولوگ-عالىمدارىنا گەتە اتىنداعى (گەرمانيا) فرانكفۋرت ۋنيۆەرسيتەتىندەگى ارىپتەستەرى قازاقستان مەن ت م د- دا بالاماسى جوق «Lintab-6» بىرەگەي قۇرىلعىسىن سىيلادى. قۇرىلعىنىڭ كومەگىمەن عالىمدار كليماتتىڭ وزگەرۋىن بولجاپ، ەكوجۇيەلەرگە تابيعي جانە انتروپوگەندىك فاكتورلاردىڭ اسەرىن باقىلاي الادى.
2014 -جىلى پاۆلودارلىق وپەرا ءانشىسى ماريا مۋدرياك يتاليانىڭ كومو قالاسىندا وتكەن حالىقارالىق AsLiCo بايقاۋىندا جەڭىسكە جەتتى.
2017 -جىلى قازاقستاننىڭ ۆەنگرياداعى ەلشىلىگىندە ەكىجاقتى قارىم-قاتىناستاردى دامىتۋعا قوسقان ۇلەسى ءۇشىن ۆەنگريانىڭ رەسمي تۇلعالارىن ماراپاتتاۋ ءراسىمى ءوتتى. «قازاقستان رەسپۋبليكاسىنىڭ تاۋەلسىزدىگىنە 25 جىل» جانە «ءنازىر تورەقۇلوۆ» مەدالدارىمەن: ۆەنگريا سىرتقى ەكونوميكالىق جانە سىرتقى ىستەر مينيسترلىگىنىڭ ەكونوميكالىق ديپلوماتيا جونىندەگى مەملەكەتتىك حاتشىسى ليەۆەنتە ماديار، سىرتقى ەكونوميكالىق جانە سىرتقى ىستەر مينيسترلىگىنىڭ «شىعىسقا بەتبۇرىس» ساياسي ستراتەگياسى جونىندەگى مەملەكەتتىك حاتشى ورىنباسارى جولت چۋتورا، سىرتقى ەكونوميكالىق جانە سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى دانيەل مەندەلەني ماراپاتتالدى.
2018-جىلى قازاقستان بىرىككەن ۇلتتار ۇيىمى قاۋىپسىزدىك كەڭەسىنىڭ ءتوراعاسى رەتىندەگى ءوز جۇمىسىن اياقتادى. قازاقستان ب ۇ ۇ قاۋىپسىزدىك كەڭەسىنە سايلانعان ورتالىق ازياداعى ءبىرىنشى مەملەكەت رەتىندە ءتوراعالىعى بارىسىندا ايماقتاعى بارلىق مەملەكەتتەرىنىڭ مۇددەلەرىن ىلگەرىلەتۋ بويىنشا بەلسەندى جۇمىسىن جالعاستىردى.
قازاقستان ب ۇ ۇ قاۋىپسىزدىك كەڭەسىندە پراكتيكالىق ناتيجەلەرگە قول جەتكىزۋگە جانە كۇن تارتىبىندە قاراستىرىلعان بارلىق ماسەلەلەر بويىنشا كەڭەستىڭ جۇمىسىنا كونسترۋكتيۆتى ۇلەس قوسۋعا ۇمتىلا وتىرىپ، بەيتاراپ، اشىق جانە ترانسپارەنتتى ءتوراعالىق ەتتى.
2019-جىلى «استانا» حالىقارالىق قارجى ورتالىعى الەمدىك رەتتەۋشىلەرمەن بىرلەسىپ «جاھاندىق قۇمسالعىش» (Global Financial Innovation Network) باعدارلاماسىن ىسكە قوستى. قارجىلىق يننوۆاتسيالاردىڭ جاھاندىق جەلىسى (Global Financial Innovation Network نەمەسە GFIN) - بۇل ۇلى بريتانيانىڭ قارجىلىق قىزمەتىن باقىلاۋ جونىندەگى باسقارۋدى، حالىقارالىق ۆاليۋتا قورىن، دۇنيەجۇزىلىك بانك توبىن جانە قارجى قىزمەتتەرىن رەتتەۋ جونىندەگى ا ح ق و كوميتەتىن قوسا العاندا، 29 الەمدىك قارجىلىق رەتتەۋشى مەن ۇيىمداردان تۇراتىن بىرلەستىك.
GFIN يننوۆاتسيا سالاسىندا ىنتىماقتاستىق جانە تاجىريبە الماسۋ؛ رەتتەۋشى تەحنولوگيالارمەن (RegTech) بايلانىستى ماسەلەلەر بويىنشا ءبىلىم الماسۋ؛ كومپانيالارعا ءبىر مەزگىلدە قازاقستان، ۇلى بريتانيا، ا ق ش جانە باسقا دا يۋريسديكتسيالاردى قوسا العاندا، بىرنەشە ەلدە يننوۆاتسيالىق ونىمدەردى، قىزمەتتەردى نەمەسە بيزنەس-مودەلدەردى تەستىلەۋگە مۇمكىندىك بەرۋ ماقساتىندا قۇرىلعان.