ەلوردادا 1 مىڭ قاۋىپسىزدىكتى باقىلاۋ كامەراسى ورناتىلادى
الداعى ۋاقىتتا قالانىڭ حالىق تىعىز ورنالاسقان اۋداندارىندا 1 مىڭ كامەرا ورناتىلادى، دەپ حابارلايدى قازاقپارات قالا اكىمدىگىنە سىلتەمە جاساپ.
بەينەباقىلاۋ كامەراسى تۇرعىن ۇيلەر، الەۋمەتتىك نىساندار جانە ساياباق ايماقتارىنا ورناتىلادى. بۇل باستاما قۇقىق بۇزۋشىلىق پەن ۇرلىق سانىن ازايتۋعا باعىتتالعان.
«قارقىندى وزگەرۋ كەزىندە جانە ازاماتتاردىڭ قاۋىپسىزدىگى ءۇشىن قالادا جاڭا تەحنولوگيالىق شەشىم قاجەت. «قاۋىپسىز اۋلا» پيلوتتىق جوباسى - بۇل باستامانىڭ العاشقى قادامى. كوپپاتەرلى ۇيلەردىڭ اۋلاسىندا اباتتاندىرۋدىڭ بۇزىلۋىن جانە قاۋىپسىزدىگىن قاداعالايتىن بەينەباقىلاۋ كامەراسىمەن قامتاماسىز ەتۋ ۇسىنىلادى»، دەلىنگەن حابارلامادا.
قازىرگى ۋاقىتتا جاڭا پروتسەسس پەن قۇرالدار سىنالىپ جاتىر. بەينەكامەرا زاڭسىز ارەكەتتى انىقتاۋ جانە الدىن الۋ ءۇشىن اۋلاداعى جاعدايعا ۇزدىكسىز مونيتورينگ جۇرگىزەدى. سونداي- اق بيىل جەدەل جاردەمنىڭ، ءورت سوندىرۋشىلەردىڭ جانە باسقا دا شۇعىل ارەكەت ەتۋ قىزمەتتەردىڭ اۋلا اۋماعىنا كەدەرگىسىز ءوتۋى ءۇشىن تاۋلىكتىڭ كەز كەلگەن ۋاقىتىندا شلاگباۋمداردى اۆتوماتتى تۇردە اشۋدى قامتاماسىز ەتۋگە مۇمكىندىك بەرەتىن «اقىلدى شلاگباۋم» پيلوتتىق جوباسى ىسكە قوسىلدى.
