بيىل نۇر-سۇلتاندا قانشا بالا 1-سىنىپقا بارادى

بۇل تۋرالى نۇر-سۇلتان قالالىق ءبىلىم باسقارماسىنىڭ باسشىسى شولپان قادىروۆا ايتتى، دەپ حابارلايدى قازاقپارات ءتىلشىسى.

«ەلوردادا ءارتۇرلى ۇلگىدەگى 399 مەكتەپكە دەيىنگى ۇيىم جۇمىس ىستەيدى. بارلىق بالاباقشا 17 تامىزدان باستاپ كەزەكشىلىك توپ رەجيمىندە جۇمىسىن قايتا باستادى. بۇگىنگى كۇنى قالا بويىنشا بالاباقشالارعا 8 مىڭنان استام بالا بارىپ ءجۇر. بۇل - ءبىزدىڭ تاربيەلەنۋشىلەردىڭ 15 پايىزى. مەكتەپكە دەيىنگى ۇيىمداردا كەزەكشى توپتاردىڭ جۇمىس ىستەۋ رەجيمى بويىنشا بالالار مەن قىزمەتكەرلەر، سونداي- اق اتا- انالار ءۇشىن جۇمىس الگوريتمى قۇراستىرىلعان»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ اتاپ وتۋىنشە، بۇگىنگى تاڭدا نۇر-سۇلتان قالاسىندا ورتا ءبىلىم بەرەتىن 117 مەكتەپ جۇمىس ىستەيدى. بۇعان قوسا بيىلعى وقۋ جىلىندا 3 جاڭا مەكتەپ اشىلادى دەپ جوسپارلانعان. ونىڭ ەكەۋى - جالپى ورتا مەكتەپ بولسا، بىرەۋى - مۇمكىندىگى شەكتەۋلى بالالارعا ارنالعان ارناۋلى مەكتەپ سانالادى. «ەلوردا بويىنشا وقۋ جىلىنىڭ باسىندا مەكتەپ وقۋشىلارىنىڭ سانى 202 مىڭنان اسادى دەپ بولجاپ وتىرمىز. 1-سىنىپقا 26 مىڭنان استام وقۋشى قابىلدانادى. بۇگىنگى كۇنى 23164 ءوتىنىش بەرىلدى»، - دەدى دەپارتامەنت باسشىسى.

شولپان قادىروۆانىڭ ايتۋىنشا، وقۋ پروتسەسى ق ر ءبىلىم جانە عىلىم مينيسترلىگىنىڭ ادىستەمەلىك ۇسىنىمدارىنا سايكەس جۇرگىزىلەدى.

اۆتور: مارلان جيەمباي