شىمكەنتتە 1- مامىرعا دەيىن ءبىرقاتار شەكتەۋ ەنگىزىلەدى

بۇل تۋرالى اقپاراتتىق-كوممۋنيكاتسيالىق ورتالىقتا وتكەن بريفينگتە شىمكەنت قالاسى اكىمىنىڭ ورىنباسارى ماقسۇت يساحوۆ ءمالىم ەتتى، دەپ حابارلايدى قازاقپارات ءتىلشىسى.

ماقسۇت پەرنەباي ۇلىنىڭ ايتۋىنشا، كوروناۆيرۋستىق ينفەكتسيانىڭ تارالۋىنا جول بەرمەۋ جانە ەپيدەميولوگيالىق جاعدايدىڭ اسقىنۋىنىڭ الدىن الۋ ماقساتىندا قالانىڭ باس مەملەكەتتىك سانيتاريالىق دارىگەرىنىڭ «كارانتيندىك شارالاردى كۇشەيتۋ تۋرالى» قاۋلىسى شىققان.

قاۋلىعا سايكەس، قالانىڭ بارلىق اۋماعىندا 19- ءساۋىرى ساعات 00:00 دەن باستاپ 01.05.2020 -جىلى ساعات 07.00 گە دەيىن ءبىرقاتار شەكتەۋلەر ەنگىزىلىپ وتىر.

«قالامىزدا ءبىر كۇندە 11 ادام كوروناۆيرۋس جۇقتىردى. وسىعان وراي، ىندەتتىڭ تارالۋ قاۋپىنە بايلانىستى قالامىزدا ساقتىق شارالارى كۇشەيتىلدى. اتاپ ايتساق، ايىرباستاۋ پۋنكتتەرىنىڭ، ميكروفينانستىق ۇيىمداردىڭ قىزمەتىن ونلاين جۇمىس رەجيمىنە جانە «كليەنتتەرگە دەيىن جەتكىزۋ» پرينتسيپى بويىنشا كوشىرۋ ارقىلى ۋاقىتشا شەكتەلەدى. سونىمەن بىرگە، قالادا قوعامدىق كولىكتەر دە جۇمىسىن توقتاتادى. قوعامدىق كولىكتەر توقتاعانىمەن قالادا ارنايى تىركەلگەن 11 تاكسي كومپانياسى جۇمىسىن جالعاستىرا بەرەدى. ولاردا 2 ادامنان ارتىق جولاۋشى الۋعا بولمايدى. تىركەلمەگەن تاكسيلەرگە رۇقسات جوق. 65 جاستان اسقان ازاماتتارعا جانە 18 سەگىز جاسقا تولماعان ازاماتتار تۇرعىن ۇيدەن ەرەسەك ادامنىڭ سۇيەمەلدەۋىنسىز شىعۋىنا تىيىم سالىندى. بۇل رەتتە شىمكەنت قالاسىنىڭ پوليتسيا دەپارتامەنتىنىڭ، ىشكى ىستەر مينيسترلىگىنىڭ ۇلتتىق گۆاردياسىنىڭ، قورعانىس مينيسترلىگىنىڭ اسكەري قۇرىلىمدارىنىڭ كۇشتەرىمەن كارانتيندىك اۋماقتى پاترۋلدەۋ تاپسىرىلدى»، - دەدى قالا اكىمىنىڭ ورىنباسارى م. يساحوۆ.

سونداي-اق، بريفينگتە ءسوز العان شىمكەنت قالاسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى المات قوساليەۆ قالا تۇرعىندارىنا كارانتين تالاپتارىن ورىنداپ، ماماندار ۇسىنعان نۇسقاۋلىقتارعا ءجىتى قۇلاق اسۋعا كەڭەس بەردى.