قازاقستاندا كۇنىنە 1 ميلليون ماسكا ءوندىرۋ كوزدەلىپ وتىر

«بۇگىنگى كۇندە قازاقستاندا 365 مىڭ ماسكا شىعارىلادى. الداعى كۇندەرى ءوندىرىس كولەمىن كۇنىنە 1 ميلليون داناعا دەيىن جەتكىزۋدى ناقتى ماقسات ەتىپ قويدىق. وعان جەتكىزەمىز دە»، - دەدى ەرالى توعجانوۆ ۇكىمەتتىڭ باسپا ءسوز ورتالىعىندا وتكەن ونلاين رەجىمدەگى بريفينگ بارىسىندا.

وسىلاي دەي كەلە ەرالى توعجانوۆ كونەدەن كەلە جاتقان «ءۇش سىناق» وسيەتىن ەسكە الدى.

«قۇرمەتتى وتانداستار، بۇگىنگى الەۋمەتتىك-ەكونوميكالىق جاعداي بارشا مەملەكەتتەر ءۇشىن ۇلكەن سىن ساعاتى بولىپ وتىرعانى بەلگىلى. وتكەن بابالارىمىزدان قالعان ءۇش سىناق قاعيداسى بار: باق سىناعى، قيىنشىلىق سىناعى، ءولىم سىناعى دەگەن. بۇگىنگى جاعداي ادام بالاسىنا عانا ەمەس، مەملەكەتىمىزگە، تاۋەلسىزدىگىمىزگە تۇسكەن سىناق بولىپ وتىر. ۇلتىمىز ءوز تاريحىندا بۇل سياقتى سىناقتاردان قانشاما رەت اۋىزبىرشىلىكتىڭ ارقاسىندا وتكەن، ادامگەرشىلىك ارقاسىندا حالىق بولىپ جابىلا كوتەرگەن. بۇگىنگى ۇرپاق تا بىرلەسە جۇمىلا وتىرىپ، ورتاق شەشىمدەرىمىزدىڭ ارقاسىندا بارلىق ماسەلەلەردى ەڭسەرەتىنىمىزگە تولىقتاي سەنەمىز»، - دەدى ۆيتسە-پرەمەر.