ميللياردەر دجەك ما امەريكاعا 1 ميلليون ماسكا سىيعا تارتتى
نۇر- سۇلتان. قازاقپارات - Alibaba كومپانياسىنىڭ نەگىزىن قالاۋشى دجەك ما ا ق ش- قا مەديتسينالىق ماسكا مەن كوروناۆيرۋستى انىقتايتىن تەستىلەردى سىيعا تارتتى، دەپ جازادى ВВС.
قىتاي ميللياردەرى Twitter- دەگى پاراقشاسىنا شانحايدا تۇرعان جۇك ۇشاعىنىڭ فوتوسىن جاريالادى. بۇعان دەيىن ول امەريكاعا 500 مىڭ تەست پەن 1 ميلليون ماسكا سىيعا تارتاتىنىن ءمالىم ەتكەن ەدى.
«دجەك ما ەۋروپاعا دا ءبىرقاتار مەديكامەنتتەر جىبەرىپ جاتىر. ول پاندەميامەن كۇرەسۋ ءۇشىن حالىقارالىق ىنتىماقتاستىققا شاقىردى»، - دەپ جازادى ВВС .
ونىڭ ايتۋىنشا، كومپانيا جاپونيا، وڭتۇستىك كورەيا، يتاليا، يران مەن يسپانياعا دا مەديكامەنتتەر جەتكىزگەن. سونىمەن قاتار قازىرگى تاڭدا بۇكىل ەۋروپاعا تاراتۋ ءۇشىن 2 ميلليون ماسكا دايىنداپ جاتىر.
ايتا كەتۋ كەرەك، بۇعان دەيىن Microsoft كومپانياسىنىڭ نەگىزىن قالاعان بيلل گەيتس پەن ايەلى مەليندا گەيتس ۆيرۋستىڭ تارالۋىن توقتاتۋمەن كۇرەسۋ شارالارىنا 100 ميلليون دوللار بولەتىنىن حابارلاعان ەدى.
اۆتور: ايكۇمىس بولاتبەك
