ەلىمىزدە 1 ميلليوننان استام ادام كوروناۆيرۋس بويىنشا تەكسەرىلدى
«2020-جىلدىڭ 6-قاڭتارىنان باستاپ دەنساۋلىق ساقتاۋ مينيسترلىگى مەملەكەتتىك شەكارانى وتكىزۋ پۋنكتتەرىندە سانيتارلىق باقىلاۋدى كۇشەيتىپ، ميلليوننان استام ادامدى تەكسەرىپ قارادى. بۇگىنگى كۇنى باقىلاۋعا 30 مىڭنان استام ادام الىندى. ينكۋباتسيالىق كەزەڭنىڭ اياقتالۋىنا بايلانىستى باقىلاۋدان ازاماتتاردىڭ نەگىزگى بولىگى شىعارىلدى. 6474 ادام ءالى دە باقىلاۋدا»، - دەدى ق ر دەنساۋلىق ساقتاۋ ءمينيسترى ەلجان بىرتانوۆ ۇكىمەت وتىرىسىندا.
ەلجان ءبىرتانوۆتىڭ ايتۋىنشا، 6- قاڭتاردان باستاپ قازىرگى ۋاقىتقا دەيىن دەنە قىزۋى كوتەرىلىپ، جەدەل رەسپيراتورلىق- ۆيرۋستىق ينفەكتسيامەن اۋىرعان 186 ادام اۋرۋحاناعا جاتقىزىلىپ، ولاردىڭ 166 ى جازىلىپ شىققان. قالعان 20 ادام ستاتسيوناردا ەم الۋدا. ولاردان كوروناۆيرۋس ينفەكتسياسى تابىلمادى.
«سىرقاتتاردان الىنعان سىنامالار رەسەي، قىتاي جانە وتاندىق ءوندىرىستىڭ تەست-جۇيەلەرىمەن زەرتتەلدى. بارلىق تەستتەر دۇنيەجۇزىلىك دەنساۋلىق ساقتاۋ ۇيىمىمەن ۆاليداتسيالاندى. وسىلايشا، قازىرگى تاڭدا بارلىعى 967 ادام زەرتحانالىق تەكسەرۋدەن ءوتتى. ونىڭ ىشىندە 544 ادام قىتاي حالىق رەسپۋبليكاسى مەن جاپونيادان كەلگەن. 423 ادام كوروناۆيرۋس كۇدىگىمەن اۋرۋحاناعا جاتقىزىلعان نەمەسە ناۋقاستارمەن بايلانىستا بولعان»، - دەيدى ەلجان ءبىرتانوۆ.
قازىرگى ۋاقىتتا ۇكىمەت رەزەرۆىنەن قاراجات ءبولىنىپ، كوروناۆيرۋس انىقتالعان جاعداي مەن ۆيرۋس تارالعان ەلدەردەن كەلگەن ادامداردى كارانتينگە ورنالاستىرۋ ماقساتىندا مەديتسينالىق ۇيىمداردىڭ دايىندىعى قامتاماسىز ەتىلىپ وتىر. تەست-جۇيەلەردىڭ، دارىلىك زاتتار مەن مەديتسينالىق بۇيىمداردىڭ، سونداي-اق جەكە قورعانۋ قۇرالدارىنىڭ قورلارى دا جاسالعان.
ەلجان بىرتانوۆتەن كەيىن ءسوز العان قازاقستاننىڭ سىرتقى ىستەر ءمينيسترى مۇحتار تىلەۋبەردى ەلىمىزدە وسى ۋاقىتقا دەيىن كوروناۆيرۋس ينفەكتسياسىن جۇقتىرۋ جاعدايى تىركەلمەگەنىن ەرەكشە اتاپ ءوتتى.
