ەرلان قارين ۇلتتىق كەڭەستىڭ 1-وتىرىسىنان كەيىن اتقارىلعان جۇمىستار جايىندا ەسەپ بەردى
«ۇلتتىق قوعامدىق سەنىم كەڭەسىنىڭ ءبىرىنشى وتىرىسىنان كەيىنگى ءۇش ايدىڭ ىشىندە اۋقىمدى جۇمىس جۇرگىزىلدى. ەڭ الدىمەن ۇلتتىق قوعامدىق سەنىم كەڭەسىنىڭ مۇشەلەرى ايتقان بارلىق ۇسىنىستار جيناقتالىپ، ءبىرتۇتاس جوسپارعا ەنگىزىلدى. بۇل جوسپارعا 70 دەن استام تارماق قاراستىرىلعان. وسى ۋاقىت ارالىعىندا بەرىلگەن باعىتتار بويىنشا بەلسەندى جۇمىس اتقارىلدى. اتاپ ايتقاندا نەگىزگى جۇمىس ءۇش باعىتتا ۇيىمداستىرىلدى»، - دەدى ەرلان قارين ۇلتتىق قوعامدىق سەنىم كەڭەسىنىڭ 2-وتىرىسىندا.
ونىڭ اتاپ وتۋىنشە، بىرىنشىدەن، پرەزيدەنت اكىمشىلىگىنىڭ باسشىسى، پرەزيدەنت اكىمشىلىگى باسشىسىنىڭ ورىنباسارى دەڭگەيىندە جانە پرەمەر- ءمينيستردىڭ ورىنباسارى دەڭگەيىندە جۇمىس جينالىستارى وتكىزىلدى. ول جينالىستارعا ۇلتتىق كەڭەس مۇشەلەرى، مۇددەلى مەملەكەتتىك ورگانداردىڭ مۇشەلەرى قاتىسىپ، ساياسي-ەكونوميكالىق جانە الەۋمەتتىك-مادەني سالالاردا ۇسىنىلعان رەفورمالار اياسىنداعى جەكەلەگەن سۇراقتاردى قارادى. بەرىلگەن مەرزىم شەگىندە جوعارى دەڭگەيدە اقوردا مەن ۇكىمەت ۇيىندە 18 جۇمىس جينالىسى مەن ءتۇرلى تالقىلاۋلار ۇيىمداستىرىلدى.
«ەكىنشىدەن، ۇلتتىق كەڭەس مۇشەلەرىنىڭ ۇسىنىستارىن ىسكە اسىرۋدىڭ ناقتى تەتىكتەرى مۇددەلى مەملەكەتتىك ورگانداردىڭ ءبىرىنشى باسشىلارى دەڭگەيىندە تالقىلاندى. اتاپ ايتقاندا، مادەنيەت جانە سپورت، ىشكى ىستەر، اقپارات جانە قوعامدىق دامۋ، اۋىل شارۋاشىلىعى مينيسترلىكتەرى جانە باس پروكۋراتۋرادا. ۇشىنشىدەن، مەملەكەت باسشىسى ۇلتتىق كەڭەس مۇشەلەرىمەن جەكە كەزدەسۋلەردى دە وتكىزدى. بۇگىنگى كۇنگە دەيىن وسىنداي كەزدەسۋلەردىڭ 16 سى ءوتتى. بۇل كەزدەسۋلەر ارى قاراي دا جوسپارلانعان. پرەزيدەنتپەن كەزدەسۋ كەزىندە ۇلتتىق كەڭەس مۇشەلەرى تاراپىنان كوتەرىلگەن ماسەلەلەر مەن ۇسىنىستار اتقارۋشى ورگاندار دەڭگەيىندە قارالىپ، ولارمەن كەرى بايلانىس قامتاماسىز ەتىلدى. جوسپارعا كىرگەن ءار تارماق پرەزيدەنت اكىمشىلىگىمەن، مەملەكەتتىك ورگانداردىڭ وكىلدەرىمەن زاڭدىق، ەكونيمكالىق جانە حالىقارالىق ستاندارتتارعا سايكەستىگى تۇرعىسىنان ساراپتالىپ، ناقتى تۇجىرىمدار دايىندالدى. ايتىلعان باعىتتار ودان ارى جالعاسادى جانە ۇلتتىق كەڭەستىڭ قىزمەتىن ۇيلەستىرۋ جۇمىسى حاتشىلىق تاراپىنان قامتاماسىز ەتىلەدى»، - دەدى ەرلان قارين ۇلتتىق قوعامدىق سەنىم كەڭەسىنىڭ 2-وتىرىسىندا.
اۆتور: مارلان جيەمباي
