جۇرگىزۋشى كۋالىگىنەن ايىرىلعان تاراز تۇرعىنى 1 جىلداي قوعامدىق كولىكتى ايداپ كەلگەن
تاراز. قازاقپارات - جامبىلدا «اۆتوبۋس» جەدەل-الدىن الۋ ءىس-شاراسى بارىسىندا پوليتسەيلەر جۇرگىزۋشى كۋالىگىنەن ايىرىلسا دا قالاداعى №43 -مارشرۋتتىق اۆتوبۋستى ايداپ جۇرگەن 25 جاستاعى جۇرگىزۋشىنى انىقتادى، دەپ حابارلايدى قازاقپارات ءتىلشىسى.
انىقتالعان جۇرگىزۋشى 2018 -جىلدىڭ سوڭىندا قارسى قوزعالىس جولاعىنا شىعىپ، جول ەرەجەسىن بۇزعانى ءۇشىن كولىك جۇرگىزۋ قۇقىعىنان ايرىلعان. الايدا ول تۋرالى جۇمىس ورنىنا حابارلاماعان.
جۇرگىزۋشى كۋالىگىنسىز جۇرگەن ازامات كۇندەلىكتى تاسىمال بارىسىندا سىرتقى جارىعى جوق كولىكتى باسقارىپ جۇرگەندىگى بەلگىلى بولعان. سونىمەن قاتار، ول وسىعان دەيىن جول ەرەجەسىن بۇزعانى ءۇشىن سەگىز رەت اكىمشىلىك جاۋاپكەرشىلىككە تارتىلىپتى.
«وسى جۇرگىزۋشىگە قاتىستى ەكى حاتتاما تولتىرىلدى. ول بويىنشا ق ر اكىمشىلىك قۇقىق بۇزۋشىلىق تۋرالى كودەكسىنە وراي 3 ايلىق جانە 30 ايلىق ەسەپتىك كورسەتكىش مولشەرىندە ايىپپۇل قاراستىرىلعان. ونىڭ باسقارۋىنداعى قوعامدىق كولىك ارنايى ايىپپۇل تۇراعىنا قويىلدى»، - دەدى تاراز قالاسى ءى ءى ب پاترۋلدىك پوليتسيا باتالونى كومانديرىنىڭ ورىنباسارى، پوليتسيا كاپيتانى نۇرجان كەرەبايەۆ.
سونداي-اق، جول-تەحنيكالىق ينسپەكسيا ءبولىمىنىڭ ماماندارى وسى مارشرۋتتىق اۆتوبۋستىڭ تەحنيكالىق جاعدايى مەن پايدالانىلۋىنا، جول قوزعالىسى قاۋىپسىزدىگىن قامتاماسىز ەتۋ ەرەجەلەرىن ورىنداماعانى ءۇشىن جاۋاپتى جەكە كاسىپكەر دە اكىمشىلىك جاۋاپكەرشىلىككە تارتىلعاندىعىن ايتادى.
اۆتور: عيبرات سەمباي
