تارازدا كۇنىنە 1 مىڭ تۇتىنۋشىعا قىزمەت كورسەتەتىن ورتالىق اشىلدى
ىرگەسى 1959 -جىلى قالانعان ەسكى عيمارات «سيفرلىق قازاقستان» باعدارلاماسى اياسىندا قايتا جاڭعىرتۋدان وتكىزىلىپ، ۋاقىت تالابىنا ساي جابدىقتالدى. جاڭا نىسان ىشىندە ءبىرىڭعاي قىزمەت كورسەتۋ زالى ورنالاسقان. تولەم قابىلداۋ كاسسالارىمەن قاتار، باسقا دا قىزمەت تۇرلەرى ءبىر تەرەزە قاعيداتى اياسىندا جۇمىس ىستەيدى. ورتالىق ءبىر كۇندە 1 مىڭ ابونەنتكە قىزمەت كورسەتۋگە قاۋقارلى.
كاسىپورىن ديرەكتورى مارات سىمايلوۆتىڭ ايتۋىنشا، مەكەمە بۇگىنگى تاڭدا 96 مىڭ ابونەنتكە، 5 مىڭ جەكە كاسىپكەرگە قىزمەت كورسەتىپ وتىر.
«بۇل عيمارات 358 مىڭ تۇرعىنى بار قالا حالقىنىڭ تولەم جاساۋىنا، كاسىپكەرلەردىڭ تەحنيكالىق كەلىسىمشارتتاردى ەش كەدەرگىسىز الۋىنا مۇمكىندىك بەرەدى دەگەن سەنىمدەمىن»، - دەدى ورتالىقتىڭ اشىلۋ سالتاناتىندا جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ.
ايتا كەتەيىك، ورتالىقتىڭ قۇرىلىس جۇمىسىن «اتلاس كونستراكشن» كومپانياسى جۇرگىزگەن.
«ءاربىر ابونەنت تولەم تۇبىرتەگىن العان سوڭ، ونى وسىندا كەلىپ تولەۋلەرىنە جانە كەلىسىمشارتقا وتىرىپ تەحنيكالىق قىزمەتتەر الۋلارىنا بولادى. ونلاين جۇيەسىمەن ەسەپ ايىرىساتىنداردىڭ دا قاتارى كۇن ساناپ ارتۋدا. ال كاسىپورىندا 700 قىزمەتكەر جۇمىس ىستەيدى. سونىمەن قاتار، سوڭعى جىلدارى بارلىق قۇرال- جابدىقتارىمىز بەن تەحنيكالارىمىز جاڭارتىلعان»، - دەيدى مارات سىمايلوۆ.